अष्ट्रेलियामा डढेलो निभाउन गएको एयर ट्याङ्कर दुर्घटना
प्रकाशित मिति : माघ ९, २०७६ बिहीबार
अष्ट्रेलियामा आगो निभाउन गएको जहाज (एयर ट्याङ्कर) दुर्घटना भएको छ । दुर्घटनामा परी ३ जनाले ज्यान गुमाएको बिबिसीले जनाएको छ । बिहीबार एक अग्नि नियन्त्रक जहाज दुर्घटना भएको अष्ट्रेलियाका अधिकारीहरूले बताएका छन् । दुर्घटनामा परी ३ जनाको ज्यान गएको छ ।
दुर्घटनाअघि पानी बोक्ने उक्त जहाज हराएको अधिकारीले बताएका थिए । बेपत्ता जहाजको भग्नावशेष फेला परेपछि उक्त जहाज दुर्घटना भएको अधिकारीहरूले पुष्टि गरेका छन् । राजधानी क्यानबेराबाट २ घण्टाको दूरीमा रहेको हिमाली क्षेत्रमा जहाज दुर्घटनाग्रस्त भएको समाचार माध्यमले जनाएका छन् । न्यु साउथ वेल्सको ग्रामीण अग्नि नियन्त्रण सेवाले पानीको फोहोरा फ्याक्ने उक्त जहाजलाई आगो निभाउनका लागि परिचालन गरिएको बताएको छ । जहाज दुर्घटनाको कारण खुली नसकेको समाचारले जनाएका छन् । दुर्घटनाग्रस्त जहाज बोइङ ७३७ रहेको बताइएको छ ।
उक्त जहाजमा सामान्यतया २ जना चालक रहने र १५ हजार लिटरभन्दा बढी पानी बोक्न सक्ने बताइएको छ ।न्यु साउथ वेल्सकी प्रधानमन्त्री ग्लेडिस बेरेजिकलियनले दुर्घटनामा परी ज्यान गुमाउनेप्रति श्रद्धाञ्जली व्यक्त गर्दै शोकाकुल परिवारप्रति समवेदना प्रकट गरेकी छन् । ‘मृतकप्रति हार्दिक श्रद्धाञ्जली तथा शोकाकुल परिवारप्रति हार्दिक समवेदना व्यक्त गर्न चाहन्छु’, बेरेजिकलियनले भनिन्, ‘यो दुर्घटनाले आगलागी अझै नियन्त्रणमा आइनसकेको प्रस्ट हुन्छ ।’-एजेन्सी