२५ रुपैयाँमै एक छाक खाना
प्रकाशित मिति : माघ ८, २०७६ बुधबार
तपाई हामी जो कसैले होटलमा खाना खादा सामान्यतया डेढ, दुईसय हाराहारी रकम तिरेर एक छाक शाकाहारी खाना खाने गर्दछौँ । तर कपिलबस्तु, चन्द्रौटामा रहेको महाकाल सामाजिक संस्थाले भने अब हरेक हप्ताको मङ्गलबार बिहान १० बजेदेखि साँझ ५ बजेसम्म २५ रुपैयाँमै खाना खुवाउने व्यवस्था गरेको छ ।
मङ्गलबार कार्यक्रमको शुभारम्भ गर्दै प्रदेशसभा सदस्य अर्जुनकुमार केसीले सस्तो मूल्यमा स्वादिष्ट र स्वस्थकर खाना खुवाउने व्यवस्था निकै सराहनीय रहेको बताए। प्रदेशसभा सदस्य केसीले २५ रुपैयाँ तिरेर खाना खाँदै खाना निकै स्वादिष्ट भएको बताए । थौरै आम्दानी भएकाका लागि यो निकै राम्रो भएको उनको भनाई थियो । २५ रुपैयाँमै खाना पाउँदा पूर्वपश्चिम आवातजावत गर्ने यात्रुका लागि यो सुविधाले फाइदा पुर्याउने वडा नं. ५ का वडाध्यक्ष अर्जुनबहादुर पाण्डेले बताए। “खाना निकै मीठो छ, २५ रुपैयाँकै खाना पनि ठूला होटलमा पाइने खाना जस्तै स्वादिष्ट छ”, पाण्डेले भने । संस्थाका सल्लाहाकार विजय जयसवालले अहिले साप्ताहिक रुपमा खाना खुवाउने भनेर यसको थालनी गरेको बताउँदै यो सफल हुँदै गएमा दैनिक बनाउने लक्ष्य लिइएको जानकारी दिए।
अहिले संस्थामा आवद्ध स्थानीय युवाको सक्रियता र सहयोगमा साप्ताहिक रुपमा सस्तोमा खानाको व्यवस्था गरिएको र यसलाई सफल बनाउन अन्यत्रबाट सहयोग आए दैनिक बनाउने उनले बताए । प्रत्येक हप्ताको मङ्गलबार चन्द्रौटामा रहेको गङ्गा कम्प्लेक्स अगाडि बिहान १० देखि साँझ ५ बजे सम्म २५ रुपैयाँमा खाना खाने व्यवस्था हुने आयोजकले जनाएको छ । -रासस