प्लास्टिकको चामल हल्लामात्रै, चामलमै हुन्छ बाउन्स हुने तत्व
प्रकाशित मिति : माघ ६, २०७६ सोमबार
सामाजिक सञ्जालमा बल जस्तै डल्लो पर्ने र बाउन्स हुने चामलको बारेमा बेलाबेलामा हल्ला फैलिने गरेको छ । भारतहुँदै यो नेपालमा पुगेको यो हल्लाका कारण पटकपटक कैयन व्यक्ति पक्राउ समेत परेका छन् । तर अहिलेसम्म प्लास्टिकको चामल भएको पुष्टी भएको छैन ।
चेन्नईमा यसरी डल्लो पारेर बलजस्तै फ्याकिएका चामलका दर्जन बढी नमुनाहरु परिक्षण गर्दा तीसबै वास्तविक चामल नै भएको पुष्टी भएको थियो । दुईबर्ष अगाडि काठमाडौंको सितापाइलाबाट समेत एकजनालाई प्लास्टिकको चामल बेचेको अभियोगमा पक्राउ गरिएको थियो तर पछि चामल बास्तविक नै रहेको पुष्टी भएको थियो ।
चामलमा स्टार्चको मात्र ८० प्रतिशतसम्म अर्थात् उच्च प्रतिशत हुने भएकाले चामलमा चप्किने गुण हुने र कैयन प्रकारका चामलहरु त्यही गुणका कारण डल्लो पर्ने विशेषज्ञहरु बताउँछन् । साथै चप्किने गुणका कारण भात डल्लोजस्तो बन्ने र उफार्दा उफ्रिने खालको समेत हुनेगर्छ । यही गुणका कारण भात वा भातको माड किताबहरु च्याचिदा र वा कागजहरु चप्काउनुपरेमा गमका रुपमा समेत प्रयोग गरिदै आएको छ ।
न्युयोर्क टाइम्सको तथ्य जाँच गर्ने कम्पनी स्कुपले पनि प्लास्टिकका चामलका बारेमा चलेका हल्लाहरु गलत भएको जनाएको छ । यस्ता हल्लाका पछि लागेर आफ्नो खाद्यपदार्थ नोक्सान नगर्न समेत सुझाव दिइएको छ ।
बीबीसीले प्रकाशित गरेको एउटा रिपोर्टमा पनि प्लास्टिक चामलको हल्ला गलत भएको जनाइएको छ । सन् २०१० देखि यो हल्ला फैलिन सुरु गरेको तथा सामानको सिपिङ बक्समा राख्ने चिप्स उत्पादन गरेको भिडियोहरु देखाएर चामल भन्दै हल्ला फिजाइएको बीबीसीको रिपोर्टमा उल्लेख छ । सिपिङ बक्समा राख्ने चिप्स उत्पादन चामल उत्पादको तुलनामा धेरै महँगो हुने समेत जनाइएको छ ।
गत जुन महिनामा फोब्र्सले पनि प्लास्टिकको चामलको हल्लाबारेमा रिपोर्ट प्रकाशित गरेको थियो । कैयन तथ्यजाँच गर्ने वेवसाइटहरुले पनि यो हल्लालाई खारेज गरिदिएका छन् । पछिल्लोपटक नेपालको पर्वतमा प्लास्टिकको चामल भेटिएको भन्दै समाचार आइरहँदा यो केवल पुरानै हल्लाकै निरन्तरता भएको आंशका गरिएको छ ।