अमेरिकामा अस्थायी कामदारका लागि योग्य देश ८४, सुचीमा नभएपनि नेपालीले आवेदन दिनसक्ने
प्रकाशित मिति : माघ ३, २०७६ शुक्रबार
अमेरिकी सरकारले कृषि क्षेत्र र गैरकृषि क्षेत्रका लागि अस्थायी कामदारहरु ल्याउन पाइने योग्य देशहरुको नयाँ सुची प्रकाशित गरेको छ । यही जनवरी १९ देखि लागु हुनेगरी अमेरिकामा अस्थायी कामदारका रुपमा आउन पाउने देशका नागरिकको नयाँ सुची प्रकाशित गरिएको हो ।
अमेरिकी कामदारहरु उपलब्ध नभएको कमसिपयुक्त, अस्थायी र सिजनल कृषि कामका लागि एच टु ए भिसामा योग्य देशहरु ८४ वटा परेका छन् । जसमा नेपाल भने योग्य भएको छैन ।
सम्पूर्ण देशको सुची र अमेरिकी सरकारले प्रकाशित गरेको सुचना यहाँ हेर्नुहोला ।
त्यस्तै कृषिबाहेकका अन्य अस्थायी कामका लागि अस्थायी कामदार भित्राउन पाइने एच टु बी भिसाका लागि ८१ देशहरु योग्य भएका छन् । यी देशको सुचीमा पनि नेपाललाई भने समावेश गरिएको छैन ।
अमेरिकी सरकारले अमेरिकामा अस्थायी कामदारका लागि योग्य हुने देशको सुची बेलाबेला अद्यावधिक गर्दै आएको छ । जसमा कुन देशलाई हटाउने र कुन देशलाई थप्ने भन्ने अधिकार अमेरिकी सरकारको डिपार्टमेन्ट अफ होमल्याण्ड सेक्युरिटी समक्ष रहन्छ ।
सामान्यतया अमेरिकी सरकारले यो भिसाका लागि सुचीमा रहेका देशका नागरिककोमात्र भिसा आवेदन स्वीकृत गर्छ । तर हरेक आवेदनको छुट्टा छुट्टै मूल्यांकन गरेर युएससीआईएसले सुचीमा नभएका देशका नागरिकका लागि समेत यी भिसाका आवेदनहरुलाई स्वीकृत गर्नसक्ने जनाएको छ ।
यसबारेको युएससीआईएसको सुचना यहाँ हेर्नुहोला ।
यो आधारमा हेर्दा नेपालीहरुले समेत यो भिसाका लागि आवेदन दिन पाउने देखिएको छ । तर नेपालीहरु स्वत योग्य हुने नभई आवेदन अनुशार युएससीआईएसले निर्णय दिनेछ ।
आर्थिक वर्ष २०१८ मा अमेरिकामा ५७४ जना नेपालीहरुले कामदार भिसा एच प्राप्त गरेका थिए । एच भिसा अन्तरगत ८ वटा क्याटेगारी रहेको छ । जसमा एचवान ए, एचवान बी, एचवान सी, एचवान बी वान, एच टु ए, एच टु बी, एच थ्री र एच फोर भिसा रहेका छन् ।
सन् २०२० को जनवरी १९ पछि पाराग्वे, डोमेनिकन रिपब्लिक र मोल्दोभाका नागरिकहरु अस्थायी कृषि कामदारका लागि योग्य हुनेछन् तर उनीहरु कृषिबाहेकका अन्य अस्थायी कामका लागि भने योग्य हुनेछैनन् । नयाँ सुचनाले पहिले नै यी भिसामा रहेकाहरुलाई आफ्नो स्टाटस थप गर्नका लागि कुनै बाधा नपुग्ने युएससीआईएसले जनाएको छ ।