अमेरिकी अध्यागमनमा तपाईले आवेदन दिएको धेरै भयो ? यसरी सार्नुहोस् अगाडि
प्रकाशित मिति : माघ २, २०७६ बिहीबार
हालै मायामीको अध्यागमन कानुनी कार्यालयमा एकजना महिला आफ्नो समस्या लिएर पुगिन् । उनले अमेरिकी नागरिकताका लागि आवेदन दिएको बर्षौ भएको रहेछ तर उनले आफ्नो आवेदनमा अहिलेसम्म निर्णण प्राप्त गर्न नसकेकी रहिछन् ।
उनले अमेरिकी नागरिकताका लागि अन्तरवार्ता पनि दिइसकेकी रहिछन् । तर युएससीआईएसले उनलाई त्यसपछि कुनै पनि जानकारी पठाएको रहेनछ । आप्रवासीका लागि काम गर्ने एउटा गैरनाफामुलक संस्थाले त्यहाँबाट प्रतिनिधिसभामा प्रतिनिधित्व गर्ने सांसदलाई सम्पर्क गरिदियो ।
सांसदको कार्यालयबाट युएससीआईएसमा सम्पर्क गरियो । त्यसको केही दिनमा नै युएससीआईएसले नागरिकताको सपथका लागि पत्र पठाएको जानकारी दियो । वर्षौदेखि अड्केको आवेदन अन्तत अगाडि बढ्यो, र ती महिलाले अमेरिकी नागरिकता प्राप्त गरिन् ।
युएससीआईएसमा आफ्नो क्षेत्रबाट प्रतिनिधित्व गर्ने सांसदका तर्फबाट सोधखोज गर्न लगाएको खण्डमा विनाकारण ढिला भएका आवेदनहरु अगाडि बढ्नसक्ने सम्भावना रहन्छ । तर सधै सांसदका कार्यालयबाट सोधखोज गर्दैमा छिटो हुन्छ भन्ने ग्यारेन्टी भने हुँदैन । यदि तपाईको आवेदन अनावश्यक रुपमा ढिलो भएको छ भने यो तरिका फाइदाजनक हुनसक्छ ।
सांसदको कार्यालयबाट सोधखोज गर्दा तपाईको आवेदनमा नकारात्मक असर पर्ला कि भनेर डराउनु नपर्ने कानुनविदहरुको सुझाव छ । त्यसैले तपाईले सांसदमार्फत सोधपुछ गराउन हिच्किचाउनु पर्दैन ।
तपाईले आफ्नो केस नम्बर, एलियन नम्बर, पूरा नाम, जन्ममिति, ठेगाना, आवेदनको प्रकार, आवेदन दिएको मिति र परेको समस्या लगायतका विवरणसहित सांसदको कार्यालयमा सम्पर्क गर्न सक्नुहुनेछ । त्यसपछि सांसदको कार्यालयका कर्मचारीले आन्तरिक रुपमा युएससीआईएसमा सम्पर्क गरेर तपाईको आवेदनबारे बुझ्न सक्छन् ।