टेक्सासले अब नयाँ शरणार्थी नलिने, शरणार्थी नलिने घोषणा गर्नेमा टेक्सास पहिलो राज्य
प्रकाशित मिति : पुस २७, २०७६ आईतबार
टेक्सासले अब नयाँ शरणार्थी नलिने भएको छ । टेक्सासका गभर्नरले आफ्नो राज्यमा पुनर्वास हुने शरणार्थीहरु स्वीकार नगर्ने घोषणा गरेका हुन् ।
अमेरिकी राष्ट्रपति डोनाल्ड ट्रम्पको कार्यकारी आदेश स्वीकार्दै टेक्सास शरणार्थीहरु नलिने घोषणा गर्ने पहिलो राज्य भएको छ । त्यहाँका गभर्नर ग्रेग अबोर्टले टेक्सासले पुनर्वास प्रकृयामा आफ्नो हिस्साको भन्दा धेरै शरणार्थी स्वीकार गरिसकेकाले अब शरणार्थीहरु नस्वीकार्ने बताएका हुन् ।
टेक्सासमा अझै पनि शरणार्थीहरु गएर बस्न त पाउनेछन् तर सुरुमा उनीहरु अन्य कुनै राज्यमा पुनर्वास गरिसकेको हुनुपर्नेछ । शरणार्थीहरु सिधै पुनर्वासका लागि टेक्सास जान भने पाउनेछैनन् ।
राष्ट्रपति ट्रम्पले अमेरिकाले स्वीकार्ने शरणार्थी संख्यामा कटौती गर्दै राज्यहरुलाई शरणार्थी लिने वा नलिने कुराको अधिकार समेत प्रदान गरेका थिए । अहिलेसम्म ४२ राज्यले शरणार्थीहरु स्वीकार्न सहमति जनाएका छन् ।
शरणार्थी अस्वीकार गर्ने राज्यमा टेक्सास पहिलो भएकोमा आप्रवासी अधिकारवादीहरुले त्यसको निन्दा गरेका छन् । यो बर्ष अमेरिकाभर ३३५० जना शरणार्थीहरुको पुनर्वास गरिएकोमा टेक्सासले २६० जना स्वीकार गरिसकेको छ ।