अष्ट्रेलियामा एकसय मिलियन डलर मनी लन्डरिंग अभियोगमा पक्राउ नेपाली धरौटीमा रिहा
प्रकाशित मिति : मंसिर २८, २०७६ शनिबार
एकसय मिलियन अष्ट्रेलियन डलर मनी लण्डरिंगको अभियोगमा पक्राउ परेका नेपाली धरौटीमा रिहा भएका छन् । गत जुलाईमा पक्राउ परेका विपिन थापाले अब जेलबाहिर रहेर मुद्दा लड्न पाउने भएका छन् ।
जुलाईमा पक्राउ परेका उनलाई साउथ वेल्सको एउटा जेलमा राखिएको थियो । उनले काम गर्ने कम्पनीका मालिक पक्राउ परेपछि थापा पनि पक्राउ परेका थिए ।
२९ बर्षीय थापाले अहिले कानुनी लडाईको सामना गरिरहेका छन् । यदि उनीबिरुद्धको अभियोग प्रमाणित भएमा उनले कडा कानुनी सजाय भोग्नुपर्ने हुनसक्छ ।
थापासहित अरु तीनजना पनि पक्राउ परेका थिए ।
उनीहरुमाथि दक्षिण सिड्नीलाई मुख्य केन्द्र बनाएर अष्ट्रेलिया र अन्य देशमासमेत उनीहरुले गैरकानुनी रुपमा कालोधनको ओसारपसार गरेको आरोप लागेको छ ।
चार जनालाई नै मनि लाउन्ड्रिङ गरेको, आपराधिक गतिविधिमा संलग्न भएको र रकम लुकाउने काम गरेको अभियोग छ । प्रहरी अनुसन्धानले करोडौं रुपयाँ पर्ने सिंगापुरमा रहेको एक कम्पनी खारेज गराएर डलर असुल्ने काममा समेत उनीहरुको संलग्नता रहेको देखाएको छ ।