अमेरिकामा भिसा जोगाउन नक्कली विश्वविद्यालयमा भर्ना हुने थप ९० जना पक्राउ
प्रकाशित मिति : मंसिर ११, २०७६ बुधबार
अमेरिकाको इमिग्रेशन एण्ड कस्टम इन्फोर्समेन्ट आइसले भिसा जोगाउन नक्कली विश्वविद्यालयमा भर्ना भएका थप ९० जना विदेशी विद्यार्थीहरुलाई पक्राउ गरेको खुलासा भएको छ । गतबर्षको जनवरीमा नक्कली विश्वविद्यालयमा भर्ना भएका २५० जना विद्यार्थीहरुलाई पक्राउ गरेको र त्यसमध्ये अधिकांश भारतीय रहेको समाचार आएको थियो ।
त्यसयतापनि थप ९० जना विदेशी विद्यार्थीहरु पक्राउ परेका छन् । सुरुमा पक्राउ परेका २५० जनामध्ये ८० प्रतिशतलाई आफै अमेरिका छाड्न निर्देशन दिइएको र उनीहरुले अमेरिका छाडिसकेको आइसले जनाएको छ । बाँकी २० प्रतिशतले औपचारिक देशनिकालाको आदेश पाएको र उनीहरु अमेरिकामा बस्नका लागि कानुनी लडाई लडिरहेको जनाइएको छ ।
सरकारले अमेरिकामा विद्यार्थी भिसामा आएर भिसा जोगाउनमात्र विश्वविद्यालय भर्ना हुनेहरुलाई निशानामा राखेर नक्कली विश्वविद्यालय नै खोलेको थियो । त्यही नक्कली विश्वविद्यालयमा भर्ना हुनजाँदा विद्यार्थीहरु फस्न पुगेका थिए ।
शुल्क तिरेर पढ्न जानु नपर्ने तर भिसा अद्यावधिक हुने सुविधा सहित अमेरिकी सरकारले अध्यागमन अपरेशनका दौरान नक्कली विश्वविद्यालय स्थापना गरेको थियो । मिसिगनमा फार्मिंटन युनिभर्सिटीका नाममा खोलिएको उक्त नक्कली विश्वविद्यालय लगत्तै बन्द गरिएको थियो ।
युनिभर्सिटी अफ फार्मिङटनका नामबाट खोलिएको वेवसाइटमा विद्यार्थीहरु अध्ययन गर्दै गरेका तस्वीरहरु राखिएको थियो । झट्ट हेर्दा युनिभर्सिटी नक्कली हो भनेर पत्याउन मुस्किल थियो । । अण्डर ग्रयाजुएटका लागि बार्षिक ट्युशन शुल्क साढे ८ हजार डलर र ग्रयाजुएटका लागि ११ हजार डलर तोकेर वेवसाइटमा प्रचार समेत गरिएको थियो ।
बन्द गर्नु अगाडि युनिभर्सिटीको वेवसाइट यस्तो थियो ।
तर यो युनिभर्सिटीमा कुनै कक्षा संचालन पनि हुने गरेको थिएन भने कुनै शिक्षक वा प्राध्यापक समेत नियुक्त गरिएको थिएन । क्याम्पसको नामको एउटा सानो कोठामात्र रहेको थियो । यो अमेरिकी सरकारका अण्डरकभर एजेन्टहरुले भिसाको दुरुपयोग गर्ने विदेशी विद्यार्थीहरुलाई फन्दामा पार्न स्थापना गरेका थिए । विद्यार्थी भिसा जोगाउन कलेजमा भर्ना हुने तर अध्ययन नगरी काम गर्दै अमेरिकामा बस्नेहरुलाई फन्दामा पार्न यस्तो नक्कली युनिभर्सिटी स्थापना गरिएको थियो ।
सुरुमा विद्यार्थी भिसामा अमेरिका आउने र पछि अमेरिकामा बस्न र काम गर्नका विद्यार्थी भिसा अद्यावधिक राख्नका लागि सस्ता युनिभर्सिटी खोज्ने विद्यार्थीहरुलाई फन्दामा पार्न आइसले यस्तो उपाय अपनाएको हो ।
त्यस्तै आइसले कम्तीमा ६ सय विद्यार्थीहरुलाई विद्यार्थी भिसाको दुरुपयोग गरेर अमेरिकामा नै बस्न सघाउने ८ जनालाई पनि नियन्त्रणमा लिएको थियो । यो अपरेशनका कारण कतिजना विद्यार्थीहरुले देशनिकालाको सामना गर्दैछन् भन्ने बारे आइसले केही पनि बताएको छैन ।
भिसा दुरुपयोग गर्ने विद्यार्थीलाई फसाउन अमेरिकी सरकारको गृहमन्त्रालयको वेवसाइटमा नै उक्त युनभर्सिटीलाई आधिकारिक युनभर्सिटीको सुचीमा राखिएको थियो ।
अन्तर्राष्ट्रिय विद्यार्थीहरुले पढ्न सक्ने भन्दै अमेरिकामा रहेका डिपार्टमेन्ट अफ होमल्याण्ड सेक्युरिटीले राखेका शिक्षण संस्थाहरुको सुचीमा युनिभर्सिटी अफ फार्मिङटनलाई पनि सुचिकृत गरिएको थियो । उक्त नक्कली युनिभर्सिटीको फेसबुक र ट्वीटर पेज समेत बनाइएको थियो ।