फेरी बिल गेट्स नै बने विश्वका धनी
प्रकाशित मिति : कार्तिक ३०, २०७६ शनिबार
विश्वका सबैभन्दा धनी व्यक्तिमा पुन बिल गेट्स नै दर्ज भएका छन् । शुक्रबारको सुचकांकमा बिल गेट्सले अमेजनका संस्थापक जेफ बेजोसलाई उछिनेका छन् । २ बर्षपछि बिल गेट्स विश्वका सबैभन्दा धनीको सुचीमा पुन पहिलो नम्बरमा परेका हुन् ।
झण्डै २ बर्ष अगाडि अमेजनका संस्थापक जेफ बेजोसले विश्वका सबैभन्दा धनी व्यक्तिको टाइटल पाएका थिए । गत महिना बेजोसको कम्पनीको स्टक मुल्यमा गिरावट आएपछि बिल गेट्सले बेजोसलाई उछिनेका थिए तर बिल गेट्स धेरै समय टिक्न सकेनन् ।
तर अहिले भने बिल गेट्सले माइक्रोसफ्ट कम्पनीको शेयरमा आएको ४८ प्रतिशत बृद्धिका कारण बेजोसलाई उछिनेका छन् । बेजोस विश्वका धनीहरुको सुचीमा दोश्रो नम्बरमा झरेका छन् । बेजोसको सम्पत्ति अहिले १०८ दशमलव ७ बिलियनमा झरेको छ भने बिल गेट्सको ११० बिलियन पुगेको छ ।
५५ बर्षका बेजोस सन् २०१८ मा १६० बिलियन डलरको सम्पत्तिका मालिक बनेर विश्वका सबैभन्दा धनी व्यक्ति बनेका थिए । सन् १९९८ देखि फोब्र्सको धनीहरुको सुचीमा परेका बेजोसको सम्पत्ति त्यतीबेला १ दशमलव ६ बिलियन रहेको थियो ।
तर बेजोसको सम्पत्ति स्टकमा गिरावट आएका कारणमात्र घटेको होइन । उनले पत्नीसँग गरेको डिभोर्सका कारण उनले अमेजनको चौथाई सम्पत्ति श्रीमतिलाई दिनुपरेको थियो । उनकी श्रीमति अहिले ३२ दशमलव ७ बिलियन सम्पत्तिका साथमा विश्वका २० धनीमा पर्छिन् ।
बिल गेट्स पहिलोपटक १ दशमलव २५ बिलियन डलरको सम्पत्तिका साथमा सन् १९८७ मा फोब्र्सको सुचीमा परेका थिए । सन् २०१४ मा उनी माइक्रोसफ्टको अध्यक्षबाट हटेका थिए । यद्यपी उनी बोर्ड सदस्यमा भने अझै पनि छन् ।