Follow @khasokhasmag

होलीमा जबर्जस्ती लोला हानेलाई सार्वजनिक मुद्दा


प्रकाशित मिति : फाल्गुन २७, २०७३ शुक्रबार

होलीमा जबर्जस्ती लोला हाने तथा रङ छ्यापे प्रहरीले पक्राउ गरी सार्वजनिक अपराध मुद्दामा कारबाही गर्ने भएको छ । होलीलाई मर्यादित रूपमा मनाउन प्रहरीले विशेष सुरक्षा योजना लागू गरेको जनाएको छ ।

महानगरीय प्रहरी परिसर काठमाडौंका प्रहरी उपरीक्षक प्रद्युम्न कार्कीका अनुसार जबर्जस्ती लोला, रङ हान्ने तथा अभद्र व्यवहार गर्नेहरूलाई पक्राउ गरी मुद्दा चलाइनेछ ।

होलीको दिन सांस्कृतिक कार्यक्रम हुने आठ स्थानमा डिएसपीको कमान्डमा प्रहरी खटाइने भएको छ । पर्वमा चन्दा असुल्नेलाई नियन्त्रणदेखि अनुहार नै नचिनिने गरी रङ लगाउनेलाई समेत प्रहरीले पक्राउ गरी कारबाही गर्ने भएको छ ।

बसको छतमा बस्ने, हेलमेट नलगाई मोटरसाइकल चलाउने, एउटा मोटरसाइकलमा दुईजनाभन्दा धेरै बस्नेलाई कारबाही हुने काठमाडौं परिसरद्वारा जारी विज्ञप्तिमा उल्लेख छ ।

बिहानैदेखि मापसे चेकिङ हुने
होलीको दिन आइतबार प्रहरीले बिहानैदेखि राजधानीमा मापसे चेकिङ गर्ने भएको छ । होली मनाउने नाममा मदिरा सेवन गरी सवारी चलाउने प्रवृत्ति रोक्न दिउँसै मापसे चेकिङ गर्न लागिएको महानगरीय प्रहरी ट्राफिक महाशाखाले जनाएको छ ।

होलीमा मादक पदार्थ तथा लागुऔषध सेवन गरी तीव्र गतिमा सवारी चलाउने विकृतिलाई नियन्त्रण गर्न ट्राफिक प्रहरीले मापसे चेकिङमा कडाइ गर्न लागेको हो । होलीलाई दुर्घटनारहित बनाउन आफूहरूले योजना बनाइएको ट्राफिक महाशाखाका एसपी लोकेन्द्र मल्लले बताए ।नयाँ पत्रिका

   न्युयोर्क स्टेट, डिपार्टमेन्ट अफ स्टेट, डिभिजन अफ कर्पोरेशन, दर्ता नम्बर: ५२५५२५८

नमस्ते मिडिया इन्क.

न्युयोर्क, अमेरिका

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com