मेक्सिकोसँगको सिमाक्षेत्रमा १ महिनामा ३६ हजार कागजपत्रविहिन पक्राउ, अहिलेसम्मकै कम
प्रकाशित मिति : कार्तिक २५, २०७६ सोमबार
अक्टोबर महिनामा मेक्सिकोसँगको अमेरिकी सिमाक्षेत्रमा कागजपत्रविहिन पक्राउ दर अझै घटेको छ । अक्टोबरमा सिमाक्षेत्रमा जम्मा ३६ हजार ३ सय कागजपत्रविहिन पक्राउ परेका छन् । अक्टोबर अमेरिकी आर्थिक बर्ष २०२० को पहिलो महिना हो ।
गत मे महिनाको तुलनामा सिमाक्षेत्रमा आप्रवासीहरु पक्राउ दर अक्टोबरमा ७५ प्रतिशतले घटेको छ । सेप्टेम्बरको तुलनामा पनि यो दर १० प्रतिशतले घटेको छ । राष्ट्रपति डोनाल्ड ट्रम्पको सिमानामा पर्खाल लगाउने परियोजनाको पहिलो सेक्सनको काम जारी रहदा यो तथ्यांक आएको हो ।
ग्वाटेमाला, होण्डुरस, एल साल्भाडोर लगायतका मुलुकसँग भएको सहमति र अमेरिकी सिमाक्षेत्रमा आइपुग्नु अगाडि नै बाटोमा पर्ने देशमा आप्रवासीहरु समातिने क्रम बढेकाले अमेरिकी सिमाक्षेत्रमा आप्रवासीहरु समातिने क्रममा गिरावट आएको हो । त्योबाहेक अमेरिकी सरकारको एसाइलमबारेको नीतिमा आएको कडाईका कारण पनि आप्रवासीहरु कममात्र प्रवेश गरेको जनाइएको छ ।
अमेरिकी सरकारले सिमाक्षेत्रमा आएर एसाइलम दावी गर्ने ५५ हजार भन्दा धेरैलाई अदालती सुनुवाईसम्मका लागि भन्दै मेक्सिको फिर्ता पठाइसकेको छ । पोर्ट अफ इन्ट्रीमा आएर एसाइलम दावीगर्नेमात्र नभई सिमाक्षेत्रमा समातिने आप्रवासीहरुलाई पनि एसाइलमको आवेदन स्वीकार गरिएको खण्डमा अदालती सुनुवाईसम्मका लागि मेक्सिको फिर्ता पठाउने गरिएको छ ।
