न्युयोर्कमा नेपाली उबर चालक सुसन थापा कुटिएकोमा न्युयोर्क प्रहरी यसो भन्छ
न्युयोर्कमा शनिबार नेपाली उबर चालक सुसन थापा कुटिएको विषयमा न्युयोर्क प्रहरीले थप प्रष्ट पारेको छ । न्युयोर्क प्रहरी विभागका डीसीपीआई प्रवक्ता डिटेक्टिभ एनेट शेल्टनले खसोखासका प्रधानसम्पादक किशोर पन्थीलाई दिएको जानकारी अनुशार घटनामा अहिलेसम्म कसैलाई पनि पक्राउ गरिएको छैन ।
‘मे ४ शनिबार दिउसो ३ बजे ३३६८ २१ स्ट्रीट अगाडि ११४ औं प्रहरी क्षेत्राधिकारभित्र आपराधिक क्षति पुर्याएको रिपोर्ट हामीलाई प्राप्त भएको छ । घटनामा संलग्न कसैलाई पनि अहिलेसम्म पक्राउ गरिएको छैन । अनुसन्धान जारी छ ।’ – डिटेक्टिभ एनेट शेल्टनले बताए ।
शेल्टनले घटनाबारे थप प्रष्ट पार्दै जानकारी दिए – ‘एकजना २२ बर्षका पुरुषले एकजना अज्ञात व्यक्तिले उनको सामानमा क्षति पुर्याएको, विवादका कारण उनको घाँटीमा मुक्का हानेको र पैदल भागेको प्रहरीमा रिपोर्ट गरेका छन् । पीडितको गर्धनमा एउटा सानो घाउ बनेको छ तर घटनाको परिणास्वरुप पीडितलाई अस्पताल भने भर्ना गरिएको थिएन ।’
पीडित सुसन थापाका अनुशार सुरुमा ती महिलाले उबर पुल रिक्वेस्ट गरेकी थिइन् । उनले दिएको ठेगानामा पुगेर केहीबेर कुर्दा समेत उनी नआएपछि थापाले रिक्वेस्ट रद्द गरेका थिए । केहीबेरपछि ती महिलाले दोश्रोपटक उबर पुल रिक्वेष्ट गरेकी थिइन् ।
थापाले भने –‘म त्यसपछि उनलाई पिकअप गर्न उबरले दिएको गन्तब्यमा पुगें । तर त्यहाँ उनी थिइनन् । उनको फोन कल आएपछि मैले आफूले प्रतिक्षा गरेको लोकेशन बताएँ । तर उनले लोकेशन फेला नपारेको भन्दै अत्यन्तै आक्रोशित भएर गालीगलौज गरिन् ।’
‘त्यसपछि मैले उनको पुल रिक्वेस्ट रद्द गरें । लगत्तै उनी गाडी भएको स्थानमा आइन् । अनि जोडजोडसँग गाडीको सिसा र ढोकामा हानिन् । अनि ढोका समातेर तानिन् । पछाडि अरु यात्रीपनि थिए । उनी सिटमा बसेर आफूलाई म्यानहटन लैजान भनिन् । मैले उनको उबर रिक्वेस्ट रद्द भइसकेकाले लैजान नसक्ने बताएँ । तर उनले गाली गलौजसँगै ममाथि आक्रमण गरिन् ।’ घटनाबारे बताउँदै थापाले भने ।
‘उनले मेरो टाउकोमा मुक्का र प्रहार गरिन् । त्यसपछि म केहीबेर बेहोस भएछु । उनले मेरो आइप्याडपनि फोडिदिइन् । म होसमा आएपछि प्रहरीलाई फोन गरें । तर प्रहरी पनि झण्डै २ घण्टा ढिलोमात्र आयो ।’ थापाले खसोखासलाई बताए ।
आक्रमणपछि थापा उपचारका लागि क्वीन्सको माउन्ट साइनाई अस्पतालमा गएका थिए । शनिबार बेलुका उपचारपछि उनले अहिले घरमा नै आराम गरिरहेका छन् । आइतबार दिउसो आफूलाई पटकपटक बान्ता भएको थापाले बताएका छन् । आक्रमणका कारण उनको अनुहार सुन्निएको छ भने अनुहारमा चोट समेत लागेको छ ।
आक्रमण गर्ने महिलाको विवरणका लागि उनले उबरमा सम्पर्क गरेपनि उबरले भने विवरण दिन अस्वीकार गरेको छ । प्रहरी आइपुग्दासम्म ती आक्रमणकारी महिला त्यहाँबाट भागिसकेकी थिइन् ।
