एसाइलममा प्रतिबन्ध लगाउने ट्रम्पको आदेशमाथिको अन्तिम सुनुवाई बुधबार
गैरकानुनी रुपमा सिमा पार गरेर आउनेहरुमाथि एसाइलममा प्रतिबन्ध लगाउने अमेरिकी राष्ट्रपति डोनाल्ड ट्रम्पको कार्यकारी आदेशमाथिबिरुद्धको मुद्दाको अन्तिम सुनुवाई बुधबार हुने भएको छ । सान फ्रान्सिस्कोका जिल्ला न्यायाधिस जोन टिगरले ट्रम्पको आदेश कार्यान्वयनमा स्थायी रोक लगाउने वा नलगाउने सन्दर्भमा फैसला गर्ने भएका छन् ।
गत नोभेम्बर ९ मा अमेरिकी राष्ट्रपति डोनाल्ड ट्रम्पले एसाइलमबारेको आदेशको घोषणा गरेपछि न्यायाधिसले डिसेम्बर १९ सम्म उक्त आदेश कार्यान्वयनमा अस्थायी रोक लगाएका थिए । त्यसपछि सान फ्रान्सिकोको नाइन्थ सर्किट कोर्टमा ट्रम्प प्रशासनले आदेश कार्यान्वयनको माग गर्दै अपिल गरेको थियो । तर अपिल कोर्टले पनि जिल्ला न्यायाधिसकै फैसलालाई सदर गरेको थियो ।
अब ट्रम्प प्रशासन आदेश कार्यान्वयनको माग गर्दै अमेरिकी सर्बोच्च अदालतमा पुगेको छ । गत बुधबार ट्रम्प प्रशासनले गैरकानुनी रुपमा अमेरिका प्रवेश गर्नेमाथि एसाइलममा प्रतिबन्ध लगाउने आदेश कार्यान्वयनका लागि बाटो खोल्न सर्बोच्च अदालतलाई आग्रह गरिसकेको छ ।
नोभेम्बर ९ मा जारी ट्रम्पको कार्यकारी आदेश ९० दिनका लागिमात्र रहेकोमा त्यसको म्याद फेबु्रअरीको पहिलोसाता समाप्त हुनेछ । तर त्यो भन्दा अगाडि जिल्ला न्यायाधिस वा सर्बोच्चबाट ट्रम्पको आदेश कार्यान्वयन फुकुवा हुन्छ वा हुँदैन त्यो हेर्न बाँकी छ । यदि आदेश कार्यान्वयन फुकुवा भएमा भने कम्तीमा फरबरीको पहिलोसातासम्म गैरकानुनी रुपमा अमेरिका छिर्नेहरुले एसाइलम दावी गर्न पाउनेछैनन् ।
