प्रहरी चौकीको हाताभित्रै छिमेकीलाई दिसा खुवाउने एक महिला पक्राउ
प्रकाशित मिति : बैशाख २१, २०७५ शुक्रबार
वैशाख २१, सुर्खेतमा अन्तरिक विवादका क्रममा छिमेकीलाई दिसा खुवाउने एक महिला पक्राउ परेकी छन्।
जिल्लाको बराहताल गाउँपालिका–५ की भविसरा थापा मगरले बराहताल गाउँपालिका–५ का भक्तबहादुर सलामीलाई मिलापत्र गर्ने क्रममा बड्डीचौर प्रहरी चौकीको हाताभित्रै दिसा खुवाएपछि पक्राउ परेकी हुन्।
गाउँमा सलामीले मदिरा सेवन गरी गाली बेइज्जती गरेको भनी थापाले प्रहरीचौकीमा उजुरी गरेकी थिइन्। प्रहरीले भविसरा र भक्तबहादुर दुवै पक्षलाई झिकाइ वडा नं ५ का वडाध्यक्ष दिल मसाङ्गीको रोहबरमा छलफल राखेको थियो। त्यस क्रममा अबीरको टीका लगाएर सलामीसँग मिलापत्र गर्छु भन्दै भविसराले प्लाष्टिकमा लुकाई ल्याएको दिसा भक्तबहादुरलाई खुवाएकी हुन्।
प्रहरी कार्यालय बड्डीचौरमा मिलापत्रको छलफलका क्रममा दिसा खुवाएपछि सलामीले प्रहरीमा उजुरी दिएको र त्यसैका आधारमा भविसरालाई पक्राउ गरिएको सुर्खेतका प्रमुख प्रहरी उपरीक्षक उमाकान्त चतुर्वेदीले जानकारी दिए।