विप्लव समूहका कार्यकर्ता चन्दा संकलनका लागि धम्की दिएको आरोपमा पक्राउ
प्रकाशित मिति : बैशाख १८, २०७५ मंगलबार
वैशाख १८, रसुवा– रसुवामा विप्लव नेतृत्वको नेपाल कम्युनिस्ट पार्टीका जिल्ला सदस्य तथा युवा रेड फोर्सका जिल्ला संयोजक योसाङ घले पक्राउ परेका छन्।
आमाछोदिङमो गाउँपालिका ४ गोल्जुङका ३० वर्षीय घलेले जिल्लामा रहेका जलविद्युत आयोजनामा चन्दा संकलनका लागि धम्की दिने गरेको गुनासोका आधारमा घलेलाई पक्राउ गरिएको जिल्ला प्रहरी कार्यालय रसुवाका प्रहरी निरीक्षक ध्रुव सिलवालले बताए ।
देशभर विप्लव समूहले अवाञ्छित गतिविधि गर्न सक्ने भएकाले आवश्यकताअनुसार नियन्त्रणमा लिन गृह मन्त्रालय दिएको निर्देशनअनुसार घलेलाई पक्राउ गरिएको र विप्लव समूहमा आबद्ध अन्यको खोजी भइरहेको प्रहरीले जनाएको छ ।
घले विरुद्ध परेको गुनासोबारे थप अनुसन्धान भइरहेको प्रहरीले जनाएको छ।
प्रहरीले घलेलाई पक्राउ गरे लगत्तै नेकपाले विज्ञप्ति निकालेर यसको विरोध गरेको छ।