न्युयोर्कमा ‘कृ’ को पहिलो शो हाउसफुल, दोश्रो शो अर्को साता
अनमोल केसी अभिनित चलचित्र ‘कृ’ को पहिलो शो न्युयोर्कमा हाउसफुल भएको छ । चलचित्र न्युयोर्कको क्वीन्समा रहेको उत्कृष्टमध्येको हलमा देखाइएको थियो । रिगल सिनेमाबाट संचालित यो थिएटर न्युयोर्कका उत्कृष्ट थिएटरमध्येको एक हो । जसमा हलिउडका ‘ए’ ग्रेडका चलचित्रहरु प्रिमियर हुने गरेका छन् भने बलिउडका केही चर्चित चलचित्रहरु समेत देखाइने गरिन्छ ।
चलचित्र हेरेपछि न्युयोर्कका दर्शकहरुले चलचित्रबारे सकारात्मक प्रतिकृया दिएका छन् । कथा र पटकथा अलिक कमजोर भएपनि उत्कृष्ट सिनेमेटोग्राफी, अब्बल फाइट, उत्कृष्ट संगीत लगायतले चलचित्रलाई रिच देखाएको दर्शकहरुले प्रतिकृया दिएका छन् । विगतमा नायक अनमोल केसीका चलचित्रहरु टिनएजरहरुलेमात्र रुचाउने खालका भएपनि यो चलचित्रमा उनको फरक शैलीको प्रस्तुतीले सबै उमेर समुहका दर्शकको चित्त बुझाएको छ । न्युयोर्कका अधिकांश दर्शकले चलचित्रलाई बलिउडको भन्दा निकै कम तर बन्दै आएका नेपाली चलचित्रहरुको दाँजोमा माथि राखेका छन् ।
चलचित्र हेरिसकेपछि अन्जन श्रेष्ठले चलचित्र हेर्ने क्रममा अल्क्षी अनुभव गर्नु नपरेको र हलबाट निस्कदा निराश हुनु नपरेको प्रतिकृया दिएका छन् । उनले चलचित्रमा देखाइएका ग्रामिण परिवेशका कैयन मनमोहक दृश्यले आफूलाई लोभ्याएको बताएका छन् । साथै उनले चलचित्रको सबैभन्दा अब्बल पक्ष क्यामेरा, सिनेमेटोग्राफी र फाइट रहेको बताएका छन् ।
त्यस्तै थुप्रै हलिउड र बलिउडका चलचित्रहरु समेत हेरिसकेका न्युयोर्क निवासी चर्चित लेखक राजन थपलियाले न्युयोर्कमा देखाइएका कैयन नेपाली चलचित्र हेरेर यस अगाडि निराश हुनुपरेपनि यो चलचित्र हेरेर त्यस्तो अनुभव गर्नु नपरेको बताएका छन् । नायक अनमोल केसीले आफ्नो अभिनय क्षमतालाई अझ तिखार्दै जानुपर्ने उनको सुझाव छ ।
त्यस्तै मिस नेपाल अमेरिकाका आयोजक अमित शाहले पनि यो स्तरको नेपाली चलचित्र बनेमा न्युयोर्कमा प्रदर्शन गर्दा इज्जत नजाने बताएका छन् । हलिउड र बलिउडका चलचित्रको स्वाद बसिसकेका न्युयोर्कका नेपाली दर्शकहरुको चित्त बुझाउन सक्नु नै चलचित्रको सफलताका रुपमा हेरिएको छ ।
न्युयोर्कमा मुलधारको चलचित्र थिएटरमा नेपाली चलचित्र प्रदर्शन भएको सम्भवत यो नै पहिलो पटक हो । यस अगाडि कम गुणस्तरका स्थानीय चलचित्र हलमा नेपाली फिल्म प्रदर्शन गरिदै आएपनि खासगरी नेपाली चलचित्रहरु प्रोजेक्टरबाट सामान्य पर्दामा देखाउने गरिएको थियो । जसका कारण दर्शकहरुले आवाज र दृश्यको गुणस्तर अनुभव गर्न नपाउने अवस्था रहेको थियो ।
आइतवाबार दिउसो भएको चलचित्र ‘कृ’ को न्युयोर्क प्रिमियरमा हल पूरै भरिएको थियो । चलचित्रको टिकट पहिले नै लिनेहरुका लागि २५ डलर तोकिएको थियो भने ढोकामा लिनेले ३० डलर तिरेका थिए । थिएटरको नियमित भन्दा बढी शुल्क तिर्नुपरेपनि दर्शकले पहिलोपटक गुणस्तरीय चलचित्र थिएटरमा नेपाली चलचित्रको अनुभव गर्न पाएका छन् ।
चलचित्र देखाइएको थिएटर संचालक रिगल इन्टरटेन्मेन्ट गु्रपले अमेरिकामा ५७३ वटा थिएटरहरु संचालन गर्दै आएको छ जसमा ७ हजार ३ सय ४७ स्क्रीनहरु रहेका छन् । चलचित्रको दोश्रो शो आगामी साता हुनेछ । चलचित्र र यसको टिकटबारे थप बुझ्न ९१७ ५७९ ५१४३ मा छेपकलाई सम्पर्क गर्न सकिनेछ ।
