सोल्डआउट भयो नेपाली छोराले हिलारी अभियानका लागि गरेको यो डिजाइन (अन्तरवार्ता)

खसोखास अमेरिका ब्यूरो

---

प्रकाशित मिति : आश्विन १७, २०७३ सोमबार

न्युयोर्क फेशन सप्ताहको सुरुवात अमेरिकी राष्ट्रपतिका लागि उम्मेदवार बनेकी हिलारी क्लिन्टनलाई सहयोगका लागि आर्थिक संकलनबाट भयो । टोरी बर्च लगायतका टप अमेरिकन डिजाइनरहरु राष्ट्रपति पदकी उम्मेदवार हिलारी क्लिन्टनको समर्थनमा उत्रिए । उनीहरुमध्ये धेरैले यस अगाडि नै हिलारीको समर्थनमा टिसर्टहरु बनाइसकेका थिए, जुन हिलारीको चुनावी अभियान सम्बन्धि वेवसाइटमा बेच्न राखिएको छ । हिलारीको चुनावी वेवसाइटमा राखिएका मध्ये सबैभन्दा धेरै लोकप्रिय नेपाली अमेरिकन डिजाइनर ३७ बर्षका प्रबल गुरुङको डिजाइन रहेको छ । उनको डिजाइन केही दिनमा नै सोल्ड आउट भएको थियो । हालैमात्र अमेरिकी नागरिकता लिएका प्रबलले आगामी चुनावमा पहिलो पटक राष्ट्रपति पदका लागि मतदान गर्दैछन् । त्यसैले उनले यो उत्तरदायीत्वलाई गम्भिरतापूर्वक लिएका छन् । फास्टकम्पनी डटकममा प्रकाशित उनीसँगको अन्तरवार्ताको अनौपचारिक अनुवाद र सारसंक्षेप ।

तपाईले आफूलाई नारीवादीका रुपमा व्याख्या गर्नुहुन्छ, यसो भन्नुको अर्थ के हो ?

मैले आफूलाई सामान्यतया नारीवादी भन्नेगर्छु किनभने संसारमा कुनै पनि प्रकारका समानताका लागि महिलाहरु स्वतन्त्रतातिरको महामार्ग हुन् भन्ने कुरामा म विश्वस्त छु । उनीहरुले तपाईको भाग्यको छनौटका लागि स्वतन्त्रताको प्रतिनिधित्व गर्छन् । संसारमा यस्ता ठाउहरु पनि छन्, जहाँ महिलाहरुलाई उनीहरुको जीवन उनीहरुकै लागि भएको कुरामा अधिकार छैन । म त्यस्तो परिवारबाट आएको व्यक्ति हुँ जहाँ हामीलाई एकल आमाले पालन पोषण गर्नुभयो । उहाँले आफ्ना परिबन्धहरुलाई तोड्न चाहनुहुन्थ्यो । उहाँ सधै समानताका लागि लड्नुभयो । त्यसैले म संघर्ष के हो भन्ने कुरा बुझ्छु ।

तपाईले पहिलो पटक हिलारीलाई कसरी भेट्नुभयो ?

खसोखास निशुल्क सब्सक्राइब गर्नुहोस् 🙏

अब तपाईँले अमेरिकी भिसा, ग्रीनकार्ड लगायत सम्पूर्ण अध्यागमन अद्यावधिकहरू तथा आवास, कर, स्वास्थ्य सेवा लगायतका विषयमा सूचना र स्रोतहरू छुटाउनु पर्नेछैन। ती सबै सिधै तपाईँको इनबक्समा प्राप्त गर्नुहुनेछ।

इमेल ठेगाना यहाँ प्रविष्ट गर्नुहोस्…

सब्सक्राइब गर्न यहाँ क्लिक गर्नुहोस्

मैले उहाँलाई डियन भोन फुस्टर्नबर्गको पुस्तक हस्ताक्षर कार्यक्रममा सन् २०१४ मा भेटेको थिएँ । हिलारी त्यहाँ हुनुहुन्थ्यो । यताउता हिडिरहनुभएको थियो । मैले उहाँलाई भेटेर आफ्नो परिचय दिएँ । उहाँले मेरो बारेमा पहिले नै थाहा भएको र उहाँको छोरीले मेरो डिजाइन लगाउने गरेको बताउनुभयो । मैले त्यतीबेला उहाँलाई आफूहरुको उहाँको उम्मेदवारीको प्रतिक्षा गरिरहेको बताएको थिएँ । यो सबै अनुभवले मेरो दिन नै सार्थक भएको अनुभव मलाई भएको थियो । जब मैले नेपाल छाडेर न्युयोर्कमा आएँ मैले कसैलाई पनि चिनेको थिइन । म यहाँ मेरो डिजाइनप्रतिको अभिलाषाको खोजीमा आएको थिएँ । मसँग ति सबै सपनाहरु थिए, जुन सपनाहरुलाई कतिपय मान्छेहरुले असम्भव ठान्छन् । मलाई राजनीतिप्रति पनि चासो थियो तर मैले कहिले पनि राजनीतिक प्रकृयाको एउटा भाग बनौंला भनेर सोंचेको पनि थिइन । यो मेरालागि एकदमै रोमाञ्चकारी क्षण थियो । अमेरिकाको प्रथम महिला मिशेल ओबामाले मैले डिजाइन गरेको कपडा लगाउनु वा हिलारी क्लिन्टनको चुनावी अभियानका लागि टिसर्ट बनाउनु जस्ता कुराहरु यस्ता चिजहरु थिए जसको तपाई योजना बनाउनसक्नुहुन्न ।

हिलारीको चुनावी अभियानका लागि टिसर्ट बनाउने निर्णय कसरी गर्नुभयो ?

हिलारी राष्ट्रपतिको चुनावको उम्मेदवार बनिरहँदा मलाई केही गर्ने इच्छा लागिरहेकै थियो । म उनको टिमसँग सम्पर्कमा रहेको थिएँ । उनीहरुले मलाई मेड फर हिस्ट्री टिसर्ट कलेक्सनका लागि योगदान गर्न आग्रह गरे । मेरा लागि यो आग्रह एउटा सम्मान थियो । मसँग पनि एउटा फेशन डिजाइनरको हैसियतले शुभेच्छुकहरु रहेकाले मैले यो प्लेटफर्म प्रयोग गरेर केही राम्रो काम गर्न चाहें ।

हिलारीको उम्मेदवारीलाई तपाई किन समर्थन गर्नुहुन्छ ?

म अमेरिकामा एउटा विद्यार्थीका रुपमा आएको थिएँ । त्यसपछि मैले अमेरिकामा काम गर्ने भिसा प्राप्त गरें । त्यसपछि मैले ग्रिनकार्ड प्राप्त गरें । र, डेढबर्ष अगाडि मैले अमेरिकाको नागरिकता पनि प्राप्त गरें । त्यो अत्यन्तै संवेदनशिल क्षण थियो । जसले यो भोगेको छैन, उसका लागि यसको व्याख्या गर्न मुस्किल छ । किनभने यो प्रकृया एकैरातमा हुने प्रकृया होइन ।
म मतदान गर्नका लागि योग्य भएको यो पहिलो पटक हो ।

वास्तवमा हिलारी क्लिन्टन राष्ट्रपतिको दौडका लागि सबैभन्दा योग्य व्यक्ति हुन् । उनी अमेरिकाका वर्तमान राष्ट्रपति र पहिलाका राष्ट्रपतिहरुभन्दा पनि योग्य छिन् । कतिपयले भन्छन् कि हिलारी अझ मुस्कुराएको भए हुन्थ्यो वा अझ राम्री भएको भए हुन्थ्यो । तर म यस्तो कुनै चाहना राख्दिन । म त केबल राष्ट्रपतिले आफ्नो काम राम्रोसँग गरेको मात्र चाहन्छु । म उनको उपलब्धी र योग्यताका कारण पूर्णरुपमा मोहित छु । त्यो नै मेरा लागि प्रसस्त छ । राष्ट्रपतिसँग अमेरिकाका लागिमात्र होइन, विश्वकै भाग्य र भविश्यका लागि महान जिम्मेबारी छ । म बोल्ने होइन, काम गर्ने सक्षम नेता चाहन्छु ।

अर्को कुरा हिलारी राष्ट्रपति हुँदै गरेको कुराले विश्वका लागि ठूलो सन्देश हो । अझ महिला अधिकारहरु संकुचन गरिएको वा चुनौतीपूर्ण अवस्थामा रहेका ठाउहरुका लागि यो ठूलो सन्देश हुनेछ । नेपालमा मेरो गरिब छात्राहरुलाई शिक्षा प्रदान गर्ने फाउण्डेशन छ । म नेपाल गएर उनीहरुलाई भन्न सक्नेछु कि तिमीहरु पनि हिलारी जस्तै बन्न सक्नेछौ ।

दुर्भाग्यबश हिलारीको विपक्षमा रहेका उम्मेदवार मेरो वास्तविकताको विपक्षमा छन् । म अल्पसंख्यक हुँ । म एउटा आप्रवासी हुँ । उनी (डोनाल्ड ट्रम्प) म जेका पक्षमा छु त्यसको विरुद्धमा छन् । उनी मजेहुँ त्यो सबैका विपक्षमा छन् । मैले निर्णय गरें कि यदि मैले परिवर्तन चाहने हो भने मेरालागि परिवर्तनको संवाहक चाहिन्छ । म मतदानका लागि जान आवश्यक छ । म यसबारेमा कुरा गर्न सक्षम हुन आवश्यक छ ।

तपाई हिलारीका पक्षमा मतदानका लागि आफ्नो प्लेटफर्म पनि प्रयोग गर्दै हुनुहुन्छ ?

म कसैलाई पनि उनीहरुको विश्वास परिवर्तनका लागि दवाव दिन सक्दिन । मसँग विविध प्रकारका ग्राहकहरु छन् कतिपयले हिलारीलाई विश्वास गर्छन् त कतिपयले गर्दैनन् । म स्वस्थ्य सम्बाद र वादविवादमा सहभागी हुन चाहन्छु । एउटा व्यक्तिका रुपमा, डिजाइनरका रुपमा , आप्रवासीका रुपमा, नव अमेरिकीका रुपमा म हिलारीलाई समर्थन गर्नुको कारण दिन सक्छु । म उनलाई (डोनाल्ड) विश्वास गर्न नसक्नुका कारण पनि यीनै हुन् । तर तपाई आफ्नो निर्णयका लागि आफै स्वतन्त्र हुनुहुन्छ ।

फेशन उद्योगका अरुले पनि हिलारीलाई समर्थन गर्नुपर्ने कारण के हुन सक्छ ?

यो एकदमै साधारण छ । हामीमध्ये अधिकांश उनी यो दौडका लागि सबैभन्दा योग्य भएकोमा विश्वस्त छौं । उनका विश्वास र सिद्धान्तहरुले हामीसँगै झन्झनाहट पैदा गर्छन् । फेशन समुदायमा हामी पहिचान, लिंग लगायतका सन्दर्भमा पनि अल्पसंख्यकले भरिएका छौं । यदि कसैले हाम्रो अस्तित्वमाथि नै प्रश्न गर्छ वा धम्क्याउँछ भने हामी त्यो कुरा बुझ्छौं । हामी यसमा अत्यन्तै सचेत छौं ।

प्रबलले हिलारीको अभियानका लागि गरेको डिजाइन