१ मंसिर २०८३, मंगलबार| Tuesday, November 17, 2026
अमेरिका

क्यालिफोर्नियामा अध्यागमन अधिकारीद्वारा गर्भवती महिलालाई पेपर स्प्रे हानेर पक्राउ

श्रीमानले ‘उनी गर्भवती छिन्’ भन्दाभन्दै पेपर स्प्रे प्रहार गरी भुइँमा घोप्टो पारेर हतकडी लगाइएको भिडियो वकिलद्वारा सार्वजनिक

तस्वीर : आइस

अमेरिकी आइसका अधिकारीहरूले एक गर्भवती अमेरिकी नागरिकमाथि मरिचको धुलो प्रहार गरी भुइँमा घोप्टो पारेर लडाएको र पक्राउ गरेको आरोप लागेको छ । पीडितका वकिलले सार्वजनिक गरेको भिडियोमा ती महिलाले आफू गर्भवती रहेको जानकारी गराउँदा-गराउँदै पनि अधिकारीहरूले बल प्रयोग गरेको देखिन्छ ।

वकिल प्याट्रिक कोलासिन्स्कीका अनुसार यो घटना आइतबार क्यालिफोर्नियाको मोडेस्टोस्थित स्टानिस्लास काउन्टी जेल बाहिर भएको हो । २३ वर्षीया लिजबेथ भार्गास एन्ड्रेड, उनका श्रीमान् एडोल्फो तालाभेरा अल्भाराडो र नन्द मोनिका अल्भाराडो संघीय अध्यागमन अधिकारीहरूको गतिविधि नियालिरहेका बेला यो झडप भएको थियो । आइतबार आयोजित पत्रकार सम्मेलनमा भार्गास एन्ड्रेडले आफू मोडेस्टो वरपर आइसका गतिविधि अनुगमन गर्ने एक समूहको सदस्य रहेको बताइन् ।

वकिल कोलासिन्स्कीका अनुसार भार्गास एन्ड्रेड र उनका श्रीमानले अध्यागमन अधिकारीहरूले नन्दको गाडी रोकेको देखेपछि भिडियो खिच्न सुरु गरेका थिए । नन्द मोनिकाका अनुसार अधिकारीहरूले अपरिचित व्यक्तिहरूलाई ओसारपसार गरेको आरोप लगाउँदै जबरजस्ती गाडीभित्र पसेका थिए, जसक्रममा गाडीमा रहेका एक पुरुषलाई पक्राउ गरिएको थियो ।

श्रीमान् तालाभेराले खिचेको भिडियोमा भार्गास एन्ड्रेड पन्छिन खोज्दा अधिकारीहरूले उनलाई पक्राउ गर्ने प्रयास गरेको देखिन्छ । सोही क्रममा एक अधिकारीले उनीतर्फ मरिचको धुलो छर्केको देखिन्छ, यद्यपि ठ्याक्कै कहाँ प्रहार भयो भन्ने भिडियोमा स्पष्ट छैन । भिडियोमा तालाभेराले “उनी गर्भवती छिन्” भनेर चिच्याएको सुनिन्छ । तर, त्यसको केही क्षणमै अधिकारीहरूले भार्गास एन्ड्रेडलाई भुइँमा लडाएर घोप्टो पारेकै अवस्थामा हतकडी लगाएको देखिन्छ ।

वकिलका अनुसार उनलाई आइसको हिरासतमा लगेर केही घण्टा राखेपछि रिहा गरिएको थियो । रिहाइपछि अस्पतालमा गरिएको स्वास्थ्य परीक्षणमा उनको गर्भमा रहेको शिशु सुरक्षित रहेको चिकित्सकहरूले बताएका छन् ।

भार्गास एन्ड्रेडले अधिकारीहरूले आफूमाथि एक एजेन्टलाई आक्रमण गरेको झूटा आरोप लगाएको बताउँदै त्यसको खण्डन गरेकी छिन् । वकिल कोलासिन्स्कीले उनीविरुद्ध हालसम्म कुनै पनि आपराधिक मुद्दा दायर नभएको जानकारी दिएका छन् ।

लेखक रमेश फुल्लेल

रमेश फुल्लेलले खसोखासका लागि समसामयिक विषयमा रिपोर्टिङ गर्छन्। नेपालका अनलाइन सञ्चारमाध्यममा रिपोर्टिङको अनुभव बटुलेका उनले राजनीति, अध्यागमन लगायतका विषयमा समाचार लेख्दै आएका छन्। साथै, उनले स्थानीय जनसरोकारका विषयमा समेत रिपोर्टिङ र विश्लेषण प्रस्तुत गर्दै आएका छन्।

यस लेखकका थप समाचार →