२९ कार्तिक २०८३, आइतबार| Sunday, November 15, 2026
अन्तर्राष्ट्रिय

पश्चिम अफ्रिकाबाट स्पेन छिर्ने आप्रवासीको लर्को, एकैदिन झण्डै १५ सयको उद्धार

Photo: João Rodrigues/ Unsplash

स्पेनको क्यानरी टापुमा शनिबार एकैदिन झण्डै १,५०० आप्रवासी आइपुगेका छन् । समुद्री उद्धार सेवालाई उद्धृत गर्दै समाचार एजेन्सी इएफईले आइतबार जनाएअनुसार यो संख्या सन् २०२० यताकै एकैदिनमा भित्रिएको सबैभन्दा उच्च हो ।

स्पेनी तटरक्षक बलले १४ वटा डुङ्गामा रहेका कुल १,४८८ जनाको उद्धार गरेको इएफईले उल्लेख गरेको छ । गत अक्टोबर महिनायता पश्चिम अफ्रिकी मुलुकहरूबाट स्पेनको यस द्वीपसमूहमा आप्रवासी भित्रिने क्रम तीव्र रूपमा बढिरहेको छ ।

यसअघि सन् २०२० को नोभेम्बर ७ मा क्यानरी टापु नजिकैको समुद्रबाट १,४६१ जनाको उद्धार गरिएको थियो, जुन एकैदिनको सबैभन्दा उच्च रेकर्ड थियो ।

सरकारी तथ्याङ्कअनुसार गत वर्षको सोही अवधिको तुलनामा यस वर्ष समग्रमा आप्रवासी आगमनमा कमी आएको छ । जनवरीदेखि अक्टोबर ३१ सम्मको अवधिमा आप्रवासी आगमन गत वर्षको तुलनामा ५.५ प्रतिशतले घटेको देखिन्छ । तर, पछिल्लो महिनादेखि एक्कासी बढेको चापले क्यानरी टापुका विशेषगरी साना र कम जनघनत्व भएका क्षेत्रका स्वागत तथा आपत्कालीन सेवाहरूमा थप दबाब सिर्जना गरेको छ ।

अधिकारीहरूका अनुसार शनिबार उद्धार गरिएको एउटा डुङ्गामा मात्र १२ महिला र ३६ बालबालिकासहित २४० जना सवार थिए । उद्धार गरिएका ती आप्रवासीहरूलाई क्यानरी टापुमध्येको सबैभन्दा सानो टापु ‘एल हिएरो’ लगिएको छ । उद्धार गरिएकामध्ये अधिकांश सेनेगल, गाम्बिया र गिनी कोनाक्रीका नागरिक रहेका छन् ।

शनिबार आइपुगेका १४ डुङ्गामध्ये १२ वटा एल हिएरोमा, एउटा ग्रान क्यानरियामा र अर्को टेनेरिफमा पुगेका थिए । आप्रवासी आगमनमा भएको तीव्र वृद्धिका विषयमा छलफल गर्न स्पेनका क्षेत्रीय नीति मन्त्री एन्जल भिक्टर टोरेसले आइतबार एल हिएरोको भ्रमण गर्ने कार्यक्रम रहेको छ ।

पश्चिम अफ्रिकाबाट क्यानरी टापुसम्मको एटलान्टिक समुद्री मार्ग विश्वकै सबैभन्दा जोखिमपूर्ण आप्रवासन मार्गमध्ये एक मानिन्छ । तीव्र समुद्री छाल, कडा बहाव र लामो दूरीका बाबजुद प्रत्येक वर्ष हजारौँ आप्रवासीहरू खचाखच भरिएका डुङ्गामा जोखिम मोलेर स्पेन पुग्ने प्रयास गर्छन् । सामान्यतया शरद ऋतुमा समुद्री अवस्था केही शान्त र यात्राका लागि अनुकूल हुने भएकाले यस समयमा आप्रवासी आउने क्रम बढ्ने गर्दछ ।

लेखक रमेश फुल्लेल

रमेश फुल्लेलले खसोखासका लागि समसामयिक विषयमा रिपोर्टिङ गर्छन्। नेपालका अनलाइन सञ्चारमाध्यममा रिपोर्टिङको अनुभव बटुलेका उनले राजनीति, अध्यागमन लगायतका विषयमा समाचार लेख्दै आएका छन्। साथै, उनले स्थानीय जनसरोकारका विषयमा समेत रिपोर्टिङ र विश्लेषण प्रस्तुत गर्दै आएका छन्।

यस लेखकका थप समाचार →