अमेरिकामा आप्रवासी निष्कासनको नयाँ कीर्तिमान: एकै वर्षमा ४ लाख ८३ हजारभन्दा बढी डिपोर्ट
फोटो: होमल्याण्ड सेक्युरिटी
अमेरिकी आइसले आर्थिक वर्ष २०२६ मा कीर्तिमानी ४ लाख ८३ हजार २ सय जना आप्रवासीलाई देश निकाला गरेको छ । अमेरिकी डिपार्टमेन्ट अफ होमल्यान्ड सेक्युरिटीले सार्वजनिक गरेको नयाँ तथ्याङ्कअनुसार यो सङ्ख्या आइसको इतिहासमै अहिलेसम्मकै उच्च हो ।
राष्ट्रपति डोनाल्ड ट्रम्पको दोस्रो कार्यकालमा आप्रवासीविरुद्ध चलाइएको कडा अभियानको नतिजास्वरूप यो तथ्याङ्क बाहिर आएको हो । यसअघि आर्थिक वर्ष २०२५ मा आइसले ४ लाख ४२ हजार ६ सय ४० जनालाई डिपोर्ट गरेको थियो ।
डीएचएसका अनुसार सेप्टेम्बर ३० मा समाप्त भएको आर्थिक वर्ष २०२६ मा आइसले ४ लाख ९१ हजारभन्दा बढी आप्रवासीलाई पक्राउ गरेको छ । पक्राउ पर्नेमध्ये करिब ४ लाख ७५ हजार जना आपराधिक अभियोगमा नभई कागजातविहीन रूपमा बसेको आरोपमा पक्राउ परेका हुन् ।
नयाँ तथ्याङ्कअनुसार सन् २०२६ को निष्कासन सङ्ख्या पूर्वराष्ट्रपति बाराक ओबामाको कार्यकालको तुलनामा करिब १८ प्रतिशतले बढी हो । त्यस्तै, पूर्वराष्ट्रपति जो बाइडेनको कार्यकालको अन्तिम पूर्ण वर्ष सन् २०२४ को तुलनामा यो सङ्ख्या झन्डै ७८ प्रतिशतले वृद्धि भएको छ । अगस्ट महिनामा मात्र आइसले ५० हजार ९ सय २५ जनालाई पक्राउ गरेको थियो ।
ट्रम्प प्रशासन र होमल्यान्ड सेक्युरिटी सेक्रेटरी मार्कवेन मुलिनले यो अभियानलाई सार्वजनिक सुरक्षाको मिसनका रूपमा व्याख्या गर्दै ‘खतरनाक अपराधी’ हरूलाई हटाइएको दाबी गरेका छन् । तर, विभिन्न स्वतन्त्र अध्ययन र तथ्याङ्कले भने फरक चित्र देखाएका छन् ।
सिराकुज विश्वविद्यालयको एक विश्लेषणअनुसार जुलाई र अगस्ट २०२६ मा भएका निष्कासनमध्ये ६३ प्रतिशत मात्र औपचारिक रूपमा देश निकाला गरिएका थिए भने बाँकी स्वेच्छिक रूपमा फर्किएका थिए । यस्तै, माइग्रेसन पोलिसी इन्स्टिच्युटको अध्ययनले सन् २०२५ जनवरीदेखि २०२६ जुलाईसम्म डिपोर्ट गरिएका करिब ९ लाख ८० हजार आप्रवासीमध्ये जम्मा २० प्रतिशतको मात्र आपराधिक पृष्ठभूमि रहेको देखाएको छ । अमेरिकामा कम्तीमा दुई वर्षदेखि बसोबास गरिरहेका र डिपोर्ट भएकामध्ये ७१ प्रतिशतको कुनै आपराधिक रेकर्ड थिएन ।
आप्रवासी धरपकडको यो अभियानले ट्रम्पको रिपब्लिकन पार्टीलाई हालैको मध्यावधि निर्वाचनमा ठुलो राजनीतिक धक्का पुर्याएको छ । निर्वाचनपछिको सर्वेक्षणमा ५८ प्रतिशत अमेरिकी मतदाताले ट्रम्प प्रशासनको आप्रवासन कारबाही ‘अत्यधिक कडा’ भएको बताएका छन् ।
निर्वाचनमा रिपब्लिकन पार्टीले व्यहोरेको हारपछि राष्ट्रपति ट्रम्पले पनि आफ्नो अभियान केही हदसम्म ‘अलि बढी कडा भएको’ सार्वजनिक रूपमै स्वीकार गरेका छन् । ‘६० मिनेट्स’ कार्यक्रमसँगको अन्तर्वार्तामा उनले खतरनाक अपराधी हटाउनु राम्रो भए पनि वर्षौँदेखि अमेरिकामा बसेर काम गरिरहेका र कर तिरिरहेका आप्रवासीलाई समेत डिपोर्ट गर्दा आलोचना खेप्नुपरेको बताए । उनले अब नयाँ कङ्ग्रेसमा डेमोक्रेटिक पार्टीसँग मिलेर आप्रवासन कानुन बनाउने इच्छासमेत व्यक्त गरेका छन् ।
राष्ट्रपति ट्रम्पले कडा आप्रवासन नीतिका मुख्य योजनाकार मानिने स्टिफन मिलरलाई ह्वाइट हाउसको ‘चिफ अफ स्टाफ’ मा नियुक्त गरेकाले धरपकड अभियान तत्काल नरोकिने अधिकारीहरूले बताएका छन् । आइसलाई साप्ताहिक रूपमा करिब १९ हजार जनालाई पक्राउ गर्ने लक्ष्य दिइएको छ ।
आगामी जनवरीदेखि अमेरिकी कङ्ग्रेसको दुवै सदनमा डेमोक्रेटिक पार्टीको बहुमत आउने भए पनि सन् २०२५ जुलाईमा पारित कानुनमार्फत आइसलाई ७५ अर्ब डलर अतिरिक्त बजेट विनियोजन भइसकेकाले निष्कासन अभियानलाई रोक्न विपक्षीलाई सहज नहुने देखिएको छ ।
