सेनेगल तटमा आप्रवासी बोकेको डुङ्गा दुर्घटना: कम्तीमा ३४ जनाको मृत्यु
Photo: Baptiste Riethmann/Unsplash
सेनेगलको सरकारी समाचार एजेन्सीले आधिकारिक स्रोतलाई उद्धृत गर्दै दिएको जानकारी अनुसार आप्रवासी बोकेको एउटा डुङ्गा सेनेगलको तटमा दुर्घटनाग्रस्त हुँदा कम्तीमा ३४ जनाको मृत्यु भएको छ।
सेनेगलको गृह मन्त्रालयका अनुसार दुर्घटनापछि एक जनाको जीवितै उद्धार गरिएको छ भने बेपत्ता हुनेहरूको यकिन संख्या खुल्न बाँकी छ। सेनेगलको राजधानी डकार र उत्तरी सहर सेन्ट-लुइसको बीचमा पर्ने समुद्री क्षेत्रमा सानो काठको डुङ्गा पल्टिएको हो। उक्त डुङ्गा स्पेनको क्यानरी टापुतर्फ जाँदै थियो।
आप्रवासी अधिकारका क्षेत्रमा कार्यरत स्पेनिस संस्था ‘वाकिङ बोर्डर्स’का अनुसार जनवरीदेखि मे २०२६ को अवधिमा मात्रै क्यानरी टापुतर्फको आन्ध्र महासागर मार्गमा ६३५ जनाको मृत्यु भएको छ। यो संस्थाले अनुगमन गर्ने अन्य आप्रवासन मार्गहरूको तुलनामा सबैभन्दा बढी मृत्युदर हो।
सेनेगलको आप्रवासी सहायता समूह ‘बोजा फी’का संस्थापक सालिउ डिओफका अनुसार अहिलेसम्म भेटिएका सबै शव सेनेगाली नागरिकका हुन्। अन्य यात्रुहरूको राष्ट्रियता भने अझै खुल्न सकेको छैन र खोजी कार्य जारी छ।
दुर्घटनापछि सेनेगलका राष्ट्रपति बासिरौ डिओमाये फयाले मृतकका परिवारप्रति संवेदना व्यक्त गर्दै नागरिकहरूलाई यस्ता जोखिमपूर्ण समुद्री यात्रा नगर्न आग्रह गरेका छन्। उनले सामाजिक सञ्जाल ‘एक्स’ मार्फत एक वक्तव्य जारी गर्दै यस्ता अवैध यात्रा सञ्चालन गर्ने गिरोहविरुद्धको कारबाहीलाई तीव्र पार्ने प्रतिबद्धता जनाएका छन्।
“हामी यस्ता अवैध यात्रा आयोजना गर्नेहरूविरुद्धको लडाइँलाई निरन्तरता दिनेछौँ र हाम्रा युवाहरूलाई देशभित्रै आशाजनक अवसरहरू सिर्जना गर्न अहोरात्र खट्नेछौँ,” राष्ट्रपति फयाले भनेका छन्।
यो दुखद घटनाले युरोप प्रवेशका लागि आप्रवासीहरूले प्रयोग गर्ने जोखिमपूर्ण समुद्री मार्गबारे पुनः चिन्ता बढाएको छ। ‘वाकिङ बोर्डर्स’को अनुमान अनुसार क्यानरी टापु पुग्ने प्रत्येक १०० जनामध्ये करिब २१ जनाले ज्यान गुमाउने गरेका छन्।
यसैबीच, सेनेगाली अधिकारीहरूले शुक्रबार स्पेनतर्फ जाँदै गरेको अर्को डुङ्गालाई नियन्त्रणमा लिएका छन्, जसमा १४२ जना आप्रवासी सवार थिए। तीमध्ये २३ महिला, दुई शिशु र दुई बालबालिका रहेका छन्। प्रहरीका अनुसार उक्त डुङ्गामा सेनेगल, गाम्बिया, गिनी-बिसाउ, गिनी र नाइजेरियाका नागरिकहरू थिए।
अर्कोतर्फ, स्पेनको क्यानरी टापु समूहमा पर्ने एल हिएरो टापुमा आप्रवासीहरूको सङ्ख्या ह्वात्तै बढेपछि शनिबार आपत्काल घोषणा गरिएको छ। स्थानीय अधिकारीहरूका अनुसार नोभेम्बर महिनाको सुरुवातदेखि हालसम्म करिब ३० वटा डुङ्गामार्फत ३,३०० भन्दा बढी मानिस उक्त टापुमा पुगिसकेका छन्। यो सङ्ख्या सो टापुको कुल जनसङ्ख्याको झण्डै एक-तिहाइ हो।
मध्य भूमध्यसागरीय मार्गमा युरोपेली र उत्तर अफ्रिकी देशहरूबीचको कडाइ तथा सहकार्य बढेपछि आप्रवासीहरूले क्यानरी टापुतर्फको वैकल्पिक आन्ध्र महासागर मार्ग प्रयोग गर्न थालेका हुन्।
अन्तर्राष्ट्रिय आप्रवासन सङ्गठनका अनुसार सेनेगलमा रोजगारीको सीमित अवसर, पारिवारिक दबाब र पहिलेदेखि स्थापित आप्रवासन सञ्जालका कारण मानिसहरू देश छाड्न बाध्य भइरहेका छन्। अत्यधिक भिडभाडयुक्त डुङ्गामा जोखिम मोलेर भए पनि विदेश गएर काम गर्ने र कमाउने प्रलोभन युवाहरूका लागि अझै पनि मुख्य आकर्षण बनिरहेको छ।
देशको तथ्याङ्क एजेन्सीका अनुसार २०२६ को दोस्रो त्रैमासिकसम्ममा सेनेगलमा लगभग चार जना युवामध्ये एक जना बेरोजगार रहेका छन्। सन् २०२४ को निर्वाचनमा अत्यधिक बहुमत दिएर सत्तामा पुर्याएका युवाहरूका लागि रोजगारी सिर्जना गर्नु राष्ट्रपति फयाको सरकारका लागि ठूलो चुनौती बनेको छ।
सेनेगलको गृह मन्त्रालयले आइतबार जारी गरेको वक्तव्यमा छिमेकी मुलुकहरूसँगको सहकार्यलाई अझ मजबुत बनाउँदै मानव तस्करी तथा मानव ओसारपसार गर्ने सञ्जालविरुद्धको अभियानलाई निरन्तरता दिने स्पष्ट पारेको छ।
