अमेरिकाद्वारा माइक्रोसफ्ट र एडोब लगायत ठूला आईटी कम्पनीहरूलाई ग्रीन कार्ड कार्यक्रमबाट निलम्बन
प्रकाशित मिति : २२ आश्विन २०८३, बिहिबार
Photo: Simon Ray/ Unsplash
अमेरिकी सरकारले माइक्रोसफ्ट, एडोब, कग्निजेन्ट र क्यापजेमिएनीलगायत विश्वका केही ठूला प्रविधि तथा आईटी कम्पनीहरूलाई एक प्रमुख ग्रीन कार्ड कार्यक्रमबाट निलम्बन गरेको घोषणा गरेको छ। यस कार्यक्रममार्फत दक्ष वैदेशिक श्रमिकहरूले रोजगारीका आधारमा स्थायी बसोबास प्राप्त गर्दै आएका थिए।
वरिष्ठ अमेरिकी अधिकारीहरूले यस कदमको कारण कथित धोखाधडी भएको बताएका छन्। उनीहरूका अनुसार कम्पनीहरूले अमेरिकी नागरिकहरूको सट्टा सस्तो दरमा विदेशी श्रमिकहरू राख्न यो कार्यक्रमको दुरुपयोग गर्दै आएका छन्। ट्रम्प प्रशासनको दक्ष विदेशी श्रमविरुद्धको कडा कार्लाहीको शृंखलामा यो ताजा कदम हो।
यो निलम्बन ‘पर्मानेन्ट लेबर सर्टिफिकेसन’ नामक रोजगारदाता-प्रायोजन संयन्त्रमा लक्षित छ, जसलाई प्रमुख प्रविधि कम्पनीहरू र आउटसर्चिङ फर्महरूले प्रयोग गर्दै आएका छन्। अमेरिकी सरकारले निश्चित कम्पनीहरूको लागि कुनै पनि नयाँ ‘पर्मानेन्ट लेबर सर्टिफिकेसन’ आवेदन स्वीकार नगरिने र विचाराधीन आवेदनहरूको पनि प्रक्रिया अगाडि नबढाइने जनाएको छ।
सन् २००५ मा लागू भएको ‘पर्मानेन्ट लेबर सर्टिफिकेसन’ कार्यक्रमले पुरानो कागजी प्रणालीमा आधारित “एलियन इम्प्लोइमेन्ट सर्टिफिकेसन” कार्यक्रममा हुने लामो समयको ढिलाइलाई कम गर्ने लक्ष्य राखेको थियो। यस कार्यक्रम अन्तर्गत, अमेरिकी श्रम मन्त्रालयले रोजगारदातालाई विदेशी श्रमिकको स्थायी बसोबासका लागि प्रायोजन गर्न अनुमति दिन्छ। यो प्रक्रिया व्यक्तिगत रूपमा श्रमिकले नभई योग्य अमेरिकी रोजगारदाताद्वारा सुरु गरिन्छ।
श्रम मन्त्रालयले कुनै पनि रोजगारीका अवसरका लागि पर्याप्त मात्रामा योग्य र उपलब्ध अमेरिकी श्रमिकहरू छैनन् भनी अमेरिकी युएससीआइएसलाई प्रमाणित गर्नुपर्छ। साथै, विदेशी श्रमिकको रोजगारीले समान काम गर्ने अमेरिकीहरूको ज्याला र काम गर्ने अवस्थालाई असर नगर्ने कुरा पनि सुनिश्चित गर्नुपर्छ।
‘पर्मानेन्ट लेबर सर्टिफिकेसन’ र पारिवारिक माध्यमबाहेक, व्यक्तिहरूले असाधारण क्षमता भएका व्यक्तिहरूको लागि ईबी-१ए आवेदन वा ईबी-२ राष्ट्रिय हित छुट जस्ता प्रक्रियाहरू मार्फत पनि ग्रीन कार्डका लागि आफैँ निवेदन दिन सक्छन्।
‘पर्मानेन्ट लेबर सर्टिफिकेसन’कार्यक्रम धेरै दक्ष विदेशी श्रमिकहरूका लागि अस्थायी कामदारको स्थितिलाई ग्रीन कार्डमा परिणत गर्ने एक महत्वपूर्ण कडीको रूपमा काम गर्दछ। धेरै आईटी कम्पनीहरूमा लाखौंको संख्यामा श्रमिकहरू कार्यरत छन्, जो सामान्यतया एच-१बी जस्ता अस्थायी कार्य भिसाबाट सुरु गर्छन् र पछि स्थायी बसोबासको खोजी गर्छन्।
रोजगारदातामार्फत ‘पर्मानेन्ट लेबर सर्टिफिकेसन’को प्रायोजन पाउने विकल्प बिना, विदेशी श्रमिकहरूले स्थायी बसोबासको मुख्य बाटो गुमाउन सक्छन् र लामो समयसम्म अस्थायी भिसामा बस्नुपर्ने हुन्छ। विदेशी प्रतिभाहरूले अमेरिकामा स्थायी बसोबासको बाटोलाई नै रोजगारी पाउनुको मुख्य कारण मान्ने हुनाले, कम्पनीहरूका लागि पनि विदेशी प्रतिभाहरूलाई आकर्षित गर्न कठिन हुन सक्छ।
अमेरिकाले माइक्रोसफ्ट र एडोबका साथै विश्वका केही ठूला आईटी फर्महरू-कग्निजेन्ट, इन्फोसिस, टाटा कन्सल्टेंसी सर्भिसेज, विप्र्रो, एचसीएल टेक्नोलोजिज र क्यापजेमिएनीलाई निलम्बन गरिएको जनाएको छ।
तथापि, मेटा, अमेजन वा अल्फाबेटको गुगल जस्ता अन्य कम्पनीहरू भने यस कार्यक्रममा सहभागी हुन स्वतन्त्र छन्।
यो कदमले भिसामाथिको जारी कडाइलाई अझ फराकिलो बनाएको छ, जसले अमेरिकी रोजगारी खोसिएको ट्रम्प प्रशासनले दाबी गर्दै आएको छ। उपराष्ट्रपतिको रूपमा जेडी भान्सले कुनै ठोस प्रमाणबिना नै कम्पनीहरूले अमेरिकी कर्मचारीहरूको सट्टा विदेशी श्रमिकहरूलाई राख्न र उनीहरूको ज्याला घटाउन ‘पर्मानेन्ट लेबर सर्टिफिकेसन’ कार्यक्रमको दुरुपयोग गरिरहेको बताएका छन्।
भान्सले भने, “माइक्रोसफ्टप्रति हाम्रो सन्देश यो छ: तपाईं एक महान अमेरिकी कम्पनी हुनुहुन्छ, तर तपाईंले महान अमेरिकी कामदारहरूलाई नै रोजगारी दिनुपर्छ।”
यी निलम्बनहरू राष्ट्रपति ट्रम्पले अत्यधिक दक्ष विदेशी श्रमिकहरूको नयाँ एच-१बी भिसा निवेदनहरूमा एकै पटकमा १,००,००० डलर शुल्क लगाउने निर्णय पछि आएका हुन्, जुन संघीय अदालतको आदेशबाट रोकिएको छ।
एच-१बी एक अस्थायी कार्य भिसा हो जसले दक्ष विदेशी श्रमिकहरूलाई सामान्यतया छ वर्षसम्म अमेरिकामा काम गर्न अनुमति दिन्छ। अर्कोतर्फ, ‘पर्मानेन्ट लेबर सर्टिफिकेसन’ एक स्थायी श्रम-प्रमाणपत्र प्रक्रिया हो। यो रोकले हाल एस-१बी भिसा वाहकहरूलाई प्रत्यक्ष रूपमा असर नगर्ने देखिन्छ।
केही विज्ञहरूका अनुसार ‘पर्मानेन्ट लेबर सर्टिफिकेसन’ निलम्बनले निश्चित कम्पनीहरूलाई लक्षित गरे तापनि यस किसिमका नीतिहरूले अत्यधिक दक्ष विदेशी प्रतिभाहरूलाई निरुत्साहित गरेर अमेरिकालाई विश्वव्यापी रूपमा कम प्रतिस्पर्धी बनाउने जोखिम निम्त्याउँछ।
कोलगेट विश्वविद्यालयका ल्याम्पर्ट इन्स्टिच्युट फर सिभिक एण्ड ग्लोबल अफेयर्सका निर्देशक चाड स्पार्बरले भने, “देश बाहिर दक्ष विदेशी श्रमिकहरूलाई राखेर तपाईंले अमेरिकी कामदारहरूको रक्षा गर्न सक्नुहुन्छ भन्ने सोच्नु एउटा भ्रम हो। यदि तपाईंले उनीहरूलाई हाम्रा सीमाभित्र प्रतिस्पर्धा गर्नबाट रोक्नुभयो भने, उनीहरूले पक्कै पनि विदेशमै बसेर अमेरिकीहरूसँग प्रतिस्पर्धा गर्नेछन्।”
स्ट्यानफोर्डको इमिग्रेशन पोलिसी ल्याबका पोस्टडक्टोरल फेलो अह्मेट गुलेकले स्थायी बसोबास नै प्रतिभाशाली विदेशी श्रमिकहरूका लागि देशमा बस्ने मुख्य मार्ग भएको बताएका छन्। यो बिना केही श्रमिकहरू देश छोड्नेछन् र केही त अस्थायी रूपमा पनि यहाँ आउने छैनन्।