कागजातविहीन आप्रवासी जोगाएको आरोपमा मेरिल्यान्डविरुद्ध मुद्दा, अन्य २० राज्य पनि छानबिनमा
प्रकाशित मिति : २५ असार २०८३, बिहिबार
अमेरिकाको संघीय अध्यागमन कानुन कार्यान्वयनमा अवरोध पुर्याएको आरोपमा जस्टिस डिपार्टमेन्टले मेरिल्यान्ड राज्य र त्यहाँका महान्यायाधिवक्ता एन्थोनी ब्राउनविरुद्ध मुद्दा दायर गरेको छ। मेरिल्यान्डको ‘स्यान्चुरी पोलिसी’ (शरणस्थान नीति) ले संघीय कानुनको पालनामा बाधा पुर्याएको मन्त्रालयको दाबी छ।
सह-महान्यायाधिवक्ता स्ट्यान्ली उडवर्डका अनुसार संघीय अध्यागमन अधिकारीहरूले कंग्रेसद्वारा पारित कानुन मात्र लागू गरिरहेका छन्, जुन अमेरिकी जनताको चाहनाअनुरूप छ। उनले भने, जब कुनै क्षेत्रले गैरकानुनी रूपमा बसेका विदेशीहरूलाई बचाउन यस्ता नीतिहरू बनाउँछन्, त्यसले संघीय कानुनको मात्र उल्लंघन गर्दैन, बरु आम अमेरिकी मतदाताहरूको आवाजलाई पनि दबाउँछ। आजको मुद्दाले यो प्रमाणित गर्छ कि न्याय मन्त्रालयले यस्ता कानुनविपरीतका कार्यहरूलाई कदापि सहन गर्ने छैन।
त्यस्तै, नागरिक विभागका सहायक महान्यायाधिवक्ता ब्रेट ए. शुमेटले यस्ता गैरजिम्मेवार नीतिहरूका कारण अन्ततः अमेरिकी जनताले नै दुःख पाउने बताए। उनले जस्टिस डिपार्टमेन्टले सधैं संविधान र विधिको शासनको रक्षा गर्ने प्रतिबद्धता समेत जनाए।
दायर गरिएको उजुरीमा उल्लेख भएअनुसार, मेरिल्यान्डले संघीय अध्यागमन अधिकारीहरूलाई सहयोग नगर्दा पक्राउ पुर्जी जारी हुँदा समेत संदिग्धहरूलाई संघीय हिरासतमा सुम्पन अस्वीकार गरिएको छ। यसले सुरक्षा व्यवस्थामा नकारात्मक असर पारेको र अमेरिकी संविधानको सर्वोच्चता सम्बन्धी प्रावधानको उल्लंघन गरेको मन्त्रालयको आरोप छ।
कायममुकायम महान्यायाधिवक्ता ब्लान्चका अनुसार संघीय कानुन र सञ्चालनमा बाधा पुर्याउने राज्य तथा स्थानीय नीतिहरूको पहिचान गर्न नागरिक विभागलाई निर्देशन दिइएको छ। यसअघि कोलोराडो, कनेक्टिकट, इलिनोइ र न्युयोर्क लगायतका राज्यहरूमा पनि यस्तै खालका २० वटा मुद्दाहरू दर्ता भइसकेका छन्।