पेलेपछिकै कान्छा गोलकर्ता बने स्पेनका यामाल, हुन थाल्यो मेसीसँग तुलना
प्रकाशित मिति : ७ असार २०८३, आइतबार
स्पेनका युवा स्टार लामिन यामालले विश्वकपमा आफ्नो पहिलो गोल गर्दै टोलीलाई साउदी अरेबियाविरुद्ध ४–० को शानदार जित दिलाएका छन्। १८ वर्षीय यामालको उत्कृष्ट प्रदर्शनले स्पेनलाई प्रतियोगितामा नयाँ ऊर्जा दिएको छ भने उनलाई विश्व फुटबलको भविष्यका सुपरस्टारका रूपमा थप स्थापित गरेको छ।
गत अप्रिल महिनामा ह्यामस्ट्रिङको चोट बोकेपछि सावधानीपूर्वक फिटनेस व्यवस्थापन गरिँदै आएका यामालले प्रतियोगिताको पहिलो खेलमा केप भर्डेविरुद्ध मात्र १९ मिनेट खेल्ने अवसर पाएका थिए। त्यस खेलमा स्पेन अप्रत्याशित रूपमा गोलरहित बराबरीमा रोकिएको थियो। तर, एटलान्टामा भएको साउदी अरेबियाविरुद्धको खेलमा भने उनले सुरुदेखि नै मैदान उत्रिएर आफ्नो प्रतिभाको उत्कृष्ट प्रदर्शन गरे।
खेल सुरु हुनुअघि नै रङ्गशालामा यामालकै चर्चा छाएको थियो। हजारौँ समर्थकले उनको नाम अङ्कित जर्सी लगाएका थिए भने ठूलो पर्दामा उनको तस्बिर देखिनेबित्तिकै दर्शकदीर्घा गुञ्जायमान हुने गरेको थियो। बल छोउनुअघि नै उनले खेलको वातावरण बदलिसकेका थिए।
खेल सुरु भएपछि यामालले आफ्नो तीव्र गति, आत्मविश्वास र आक्रामक खेलशैलीमार्फत स्पेनको आक्रमणलाई नयाँ जीवन दिए। विपक्षी डिफेन्डरहरूलाई सहजै छल्दै उनले निरन्तर अवसरहरू सिर्जना गरे।
स्पेनले पहिलो गोल गर्ने क्षण पनि यामालकै नाममा रह्यो। पेनाल्टी क्षेत्रभित्र आएको ‘लो क्रस’ लाई उनले पछाडिको पोस्टमा स्लाइड गर्दै जाली चुमाए। यो उनको विश्वकप करियरको पहिलो गोल थियो। गोलसँगै रङ्गशाला उत्साहले भरियो र समर्थकहरूले उनको नाम गुञ्जाए।
यामाल विश्वकप इतिहासमा १९ वर्ष नपुग्दै गोल गर्ने सातौँ खेलाडी बनेका छन्। साथै, १८ वर्ष वा सोभन्दा कम उमेरमा विश्वकप खेलमा पहिलो गोल गर्ने उनी दोस्रो खेलाडी हुन्। यसअघि सन् १९५८ को विश्वकपमा ब्राजिलका महान् खेलाडी पेलेले १७ वर्षको उमेरमा वेल्सविरुद्ध यस्तो उपलब्धि हासिल गरेका थिए।
उनको प्रदर्शनको तुलना अहिले फुटबलका महान् खेलाडी लियोनल मेसीसँग हुन थालेको छ। बार्सिलोनामा मेसीका थुप्रै उमेरसम्बन्धी कीर्तिमानहरू तोडिसकेका यामालले विश्वकपमा पनि मेसीभन्दा कम उमेरमा पहिलो गोल गर्ने उपलब्धि हासिल गरेका छन्। मेसीले सन् २००६ को विश्वकपमा आफ्नो पहिलो गोल १९ औँ जन्मदिनको केही दिनअघि गरेका थिए। यामालले त्यो उपलब्धि मेसीको भन्दा दुई साता कम उमेरमै पूरा गरेका छन्।
स्पेनले यामालको फिटनेसलाई आगामी दिनमा पनि सावधानीपूर्वक व्यवस्थापन गरिरहने जनाएको छ। यदि उनी पूर्ण रूपमा फिट रहे भने स्पेनको विश्वकप यात्रामा निर्णायक भूमिका खेल्न सक्छन्।