न्यूयोर्कका होटलमा कमजोर बुकिङ, विश्वकप आम्दानी अनुमानको आधा मात्रै हुने अपेक्षा
प्रकाशित मिति : ४ असार २०८३, बिहिबार
“Photo” by ajstarks is licensed under CC BY-NC 2.0 
.
न्यूयोर्क सिटीका होटलहरूले फिफा विश्वकप अवधिमा अपेक्षित आम्दानीको करिब आधा मात्र गर्ने प्रक्षेपण गरिएको छ।
होटल एसोसिएसन अफ न्यूयोर्क सिटीले बिहीबार सार्वजनिक गरेको नयाँ अनुमानअनुसार, विश्वकप अवधिमा होटल आम्दानी वृद्धि करिब २० करोड डलर हुने अघिल्लो अनुमान घटाएर झण्डै १० करोड डलरमा झारिएको छ।
उद्योग समूहले कमजोर बुकिङ, अन्तर्राष्ट्रिय यात्रामा बढ्दो अवरोध र सञ्चालन खर्चमा वृद्धि यस गिरावटका मुख्य कारण भएको जनाएको छ। प्रतियोगिताअघि सम्भावित होटल कामदार हड्ताल टरे पनि अपेक्षित आर्थिक लाभ हासिल नहुने संकेत देखिएको छ।
उद्योगले महिनौँदेखि विश्वकपजस्तो ठूलो अवसरका लागि बुकिङ लक्ष्यभन्दा कम रहेको चेतावनी दिँदै आएको थियो। अमेरिकन होटल एण्ड लजिङ एसोसिएसनको हालैको प्रतिवेदनअनुसार न्यूयोर्कका ६० प्रतिशत होटल सञ्चालकहरूले अपेक्षाभन्दा कम बुकिङ भएको बताएका छन्। यसको प्रमुख कारणका रूपमा भू–राजनीतिक अस्थिरता र अन्तर्राष्ट्रिय पर्यटनमा आएको गिरावटलाई औंल्याइएको छ।
अन्तर्राष्ट्रिय पर्यटकहरूले सामान्यतया घरेलु पर्यटकभन्दा धेरै खर्च गर्ने भए पनि उनीहरू भिसा ढिलाइ, यात्रा प्रतिबन्ध, कडा आप्रवासन नीति लगायतका अवरोधका कारण प्रभावित भएका छन्। उद्योगका अनुसार यी कारणहरूले माग घटाएको छ र सहरको पर्यटन अर्थतन्त्रमा असर परेको छ। इरानसँग सम्बन्धित युद्धलगायतका तनावले होटल व्यवसायमा थप १० देखि १५ प्रतिशतसम्म गिरावट ल्याएको अनुमान गरिएको छ।
यसबीच, विश्वकप अवधिमा हुन सक्ने होटल कामदारहरूको हड्ताल अन्तिम समयमा टारिएको थियो। होटल एसोसिएसन अफ न्यूयोर्क सिटीले युनियनसँग सम्झौता गरेर सम्भावित श्रम अवरोध हटाएको थियो। यदि हड्ताल भएको भए, यसले पर्यटक आगमनमा थप गिरावट ल्याउने र आर्थिक क्षति बढाउने जोखिम रहेको उद्योगको भनाइ छ।
होटल एसोसिएसन अफ न्यूयोर्क सिटीका अध्यक्ष तथा सीईओ विजय डान्डापानीले भने, ‘अब स्पष्ट भएको छ कि विश्वकपबाट अपेक्षित आर्थिक बूम असफलतामा परिणत हुँदैछ। महिनौँदेखि हामीले बुकिङ र आम्दानी अपेक्षाभन्दा कम रहेको चेतावनी दिँदै आएका थियौँ। अहिले प्रतियोगिता सुरु हुनै लाग्दा होटलहरूले अपेक्षित आम्दानीको आधा मात्र गर्ने अवस्था देखिएको छ।’
न्यूयोर्क सिटीको होटल उद्योग अहिले पनि बढ्दो मुद्रास्फीति, सञ्चालन खर्चमा वृद्धि र अन्तर्राष्ट्रिय पर्यटनमा आएको दीर्घकालीन गिरावट जस्ता चुनौतीसँग जुधिरहेको छ। यस उद्योगले सहरमा ४० हजारभन्दा बढी होटल कामदार तथा करिब ४ लाख आतिथ्य सेवा क्षेत्रमा रोजगारी सिर्जना गर्दै आएको छ र वार्षिक अर्बौँ डलर कर आम्दानीमा योगदान पुर्याउँछ।
१८७८ मा स्थापित होटल एसोसिएसन अफ न्यूयोर्क सिटीले सहरका करिब ३०० होटलहरूको प्रतिनिधित्व गर्दै ८० हजारभन्दा बढी कोठा समेटेको छ।