अदालतको आदेश उल्लङ्घन गरी निष्कासन गरिएकी छात्रालाई अमेरिका फर्काउन ट्रम्प प्रशासनलाई आदेश
प्रकाशित मिति : २ फाल्गुन २०८२, शनिबार
एनी लुसिया लोपेज बेलोजा ।तस्वीर : गोफन्डमी
अमेरिकी संघीय अदालतले अदालतको आदेश उल्लङ्घन गर्दै निष्कासन गरिएकी एक होन्डुरसकी कलेज छात्रालाई अमेरिका फर्काउन सहजीकरण गर्न राष्ट्रपति डोनाल्ड ट्रम्प प्रशासनलाई निर्देशन दिएको छ।
बोस्टनस्थित अमेरिकी जिल्ला न्यायाधीश रिचर्ड स्टर्न्सले शुक्रबार दिएको आदेशमा डोनाल्ड ट्रम्प प्रशासनलाई दुई हप्ताभित्र छात्रा एनी लुसिया लोपेज बेलोजालाई अमेरिका फर्काउन आवश्यक प्रक्रिया अघि बढाउन भनिएको छ। लोपेज बेलोजा म्यासाचुसेट्सस्थित ब्याबसन कलेजमा अध्ययनरत छात्रा हुन्।
उनी टेक्सासमा परिवारसँग थ्याङ्क्सगिभिङ बिदा मनाउन जाँदा बोस्टनको लोगान विमानस्थलमा पक्राउ परेकी थिइन्। त्यसपछि अदालतले ७२ घण्टासम्म उनलाई निष्कासन नगर्न आदेश दिएको भए पनि नोभेम्बर २२ मा उनलाई होन्डुरस पठाइएको थियो।
न्यायाधीश स्टर्न्सले आफ्नो आदेशमा सरकारले गल्ती स्वीकार गरेको उल्लेख गर्दै अब त्यसलाई सच्याउने समय आएको बताएका छन्। उनी पूर्व अमेरिकी राष्ट्रपति बिल क्लिन्टनद्वारा नियुक्त न्यायाधीश हुन्।
यसअघि अमेरिकी इमिग्रेशन एन्ड कस्टम्स इन्फोर्समेन्ट (आइस)ले छात्रालाई अमेरिका फर्काउन सहजीकरण गर्न अस्वीकार गरेको थियो। साथै, अमेरिकी डिपार्टमेन्ट अफ होमल्याण्ड सेक्युरिटी (डिएचएस)ले उनलाई विधिसम्मत प्रक्रिया दिइएको दाबी गरेको छ।
२० वर्षीया लोपेज बेलोजा ८ वर्षको उमेरमा आश्रय खोज्दै आमासँग अमेरिका पुगेकी थिइन्। उनले आफूविरुद्ध अन्तिम निष्कासन आदेश रहेकोबारे जानकारी नभएको बताएकी छन्। हाल उनी आफ्ना हजुरबा–हजुरआमासँग होन्डुरसमै बसिरहेकी छन्।
लोपेज बेलोजाका वकिलले अदालतको आदेशको स्वागत गर्दै उनलाई दृढ र संघर्षशील युवती भएको बताएका छन्। अदालतले प्रशासनलाई फेब्रुअरी २७ भित्र उनलाई अमेरिका फर्काउन आवश्यक कदम चाल्न समयसीमा दिएको छ।