स्विट्जरल्यान्डको बारमा आगलागी: कम्तीमा ४० जनाको मृत्यु
प्रकाशित मिति : पुस १६, २०८२ बिहीबार
फोटो : सिन्ह्वा/रासस
स्विट्जरल्यान्डको बारमा भएको भीषण आगलागीमा परी कम्तीमा ४० जनाको मृत्यु भएको छ। घटनामा ११५ जना घाइते भएका छन् भने धेरैको अवस्था गम्भीर रहेको प्रहरीले जनाएको छ।
नयाँ वर्षको उत्सव मनाउने क्रममा क्रान्स-मोन्टाना रिसोर्टस्थित “ले कन्स्टेलेसन” नामक बारमा उक्त आगलागी भएको हो। अधिकारीहरूले घटनाको अनुसन्धान जारी रहेको बताएका छन् भने यसमा कुनै पनि प्रकारको आक्रमणको संलग्नता नभएको स्पष्ट पारेका छन्।
प्रभावित नागरिकहरू: क्षेत्रीय प्रहरी प्रमुख फ्रेडरिक गिस्लरका अनुसार अहिलेको मुख्य प्राथमिकता मृतकहरूको पहिचान गरी परिवारलाई शव हस्तान्तरण गर्नु हो।
इटालीले आफ्ना १६ नागरिक बेपत्ता रहेको र अन्य १२-१५ जना घाइते भई अस्पतालमा उपचाररत रहेको जानकारी दिएको छ। फ्रान्सले आफ्ना केही नागरिक हराइरहेको र घाइते भएको पुष्टि गरेको छ।
उद्धारका लागि १३ वटा हेलिकप्टर, ४२ वटा एम्बुलेन्स र १५० जना आपतकालीन उद्धारकर्मी घटनास्थलमा खटिएका थिए। घाइतेमध्ये धेरैलाई गम्भीर जलन भएको छ।
चिकित्सकका अनुसार फोक्सोमा विषालु धुवाँ पुगेका कारण बिरामीहरूको अवस्था झन् जटिल बनेको छ। घाइतेहरूमा १५ देखि २५ वर्ष उमेर समूहका युवाको सङ्ख्या उल्लेख्य छ।
विज्ञहरूले आगलागी यति तीव्र गतिमा फैलिनुको कारण “फ्ल्यासओभर” प्रभाव हुनसक्ने बताएका छन्। यस्तो अवस्थामा केही सेकेन्डभित्रै आगोले पूरै कोठालाई आफ्नो चपेटामा लिन्छ।
स्विस महान्यायाधिवक्ता बेआत्रिस पिलूदको नेतृत्वमा घटनाको अनुसन्धान भइरहेको छ। उनले भवनको साँघुरो सिँढी लगायतका विभिन्न प्राविधिक पक्षहरूको जाँच भइरहेको बताए पनि कुनै ठोस निष्कर्षमा नपुगेको स्पष्ट पारिन्।
स्विस राष्ट्रपति गाइ पार्मेलिनले यस घटनालाई “देशले भोगेका सबैभन्दा दुःखद त्रासदीमध्ये एक” भनी व्याख्या गरेका छन्।
स्विट्जरल्यान्ड विश्वकै सुरक्षित र व्यवस्थित देशहरूमध्ये एक मानिन्छ। कडा भवन मापदण्ड, आधुनिक आपतकालीन सेवा र प्रभावकारी प्रशासनका कारण त्यहाँ ठूला आगलागीका घटना विरलै हुने गर्छन्।
तर, कहिलेकाहीँ होटल, बार, रात्रिकालीन क्लब (नाइटक्लब), पुराना भवन वा पर्यटकीय क्षेत्रमा हुने आगलागीले ठूलो मानवीय क्षति पुर्याएको इतिहास पनि छ।
स्विट्जरल्यान्डमा हुने आगलागीका प्रमुख कारणहरूमा विद्युत् सर्ट सर्किट, खाना पकाउँदा हुने लापरबाही, अत्यधिक भीड हुने मनोरञ्जन स्थलको सजावटमा प्रयोग गरिने प्रज्वलनशील सामग्री, र आपतकालीन निकास साँघुरो वा अवरुद्ध हुनु जस्ता पक्षहरू रहेका छन्।