लागू औषध बोकेको डुंगामा अमेरिकी आक्रमण,४ जनाको मृत्यु
प्रकाशित मिति : कार्तिक १२, २०८२ बुधबार
अवैध लागूऔषध ढुवानीमा संलग्न एक डुङ्गामाथि अमेरिकाले आक्रमण गरेको छ । अमेरिकी अधिकारीहरूका अनुसार उक्त आक्रमणमा चार जनाको मृत्यु भएको छ ।
अमेरिकी युद्ध मन्त्री पिट हेगसेथले सामाजिक सञ्जाल ‘एक्स’ मार्फत पूर्वी प्रशान्त महासागरमा लागूऔषध ढुवानीको शङ्का गरिएको एउटा डुङ्गामाथि अमेरिकाले गरेको आक्रमणमा चार जनाको मृत्यु भएको पुष्टि गरेका छन् ।
उनले राष्ट्रपति डोनाल्ड ट्रम्पको निर्देशनमा युद्ध मन्त्रालयले अर्को लागुऔषध तस्करी गर्ने डुङ्गामाथि घातक प्रहार गरेको पनि बताएका छन् ।
यसअघि, सोमबार पनि अमेरिकी सेनाले प्रशान्त महासागरमा लागूऔषध ढुवानीमा संलग्न शङ्कास्पद डुङ्गाहरूमाथि आक्रमण गर्दा १४ जनाको मृत्यु भएको थियो ।
यी पछिल्ला आक्रमणहरू राष्ट्रपति ट्रम्पको प्रत्यक्ष निर्देशनमा भएका हुन् । ह्वाइट हाउसले पछिल्ला हमलाहरूलाई अमेरिकी सीमामा प्रशान्त र क्यारिबियन हुँदै आउने समुद्री लागूपदार्थ आपूर्ति रोक्ने अभियानको रूपमा व्याख्या गरेको छ ।
युद्धमन्त्रीका अनुसार आक्रमण अन्तर्राष्ट्रिय जल क्षेत्रमा गरिएको हो । अधिकारीहरूले आक्रमणको क्रममा अमेरिकी सैनिकलाई कुनै क्षति नपुगेको बताएका छन् ।
दुई महिनामा अमेरिकाले गरेका यस्ता आक्रमणहरूमा कम्तीमा ६० जनाको मृत्यु भएको छ । अमेरिका, कोलम्बिया र भेनेजुएलाबीचको सम्बन्धमा यी आक्रमणहरूले तनाव बढाएको देखिएको छ । आक्रमणपछि अमेरिकी कांग्रेसका दुवै दलका सांसदहरूले पनि राष्ट्रपति ट्रम्पको अधिकारमाथि प्रश्न उठाएका छन् ।
अमेरिकाले हाल क्यारिबियन क्षेत्रमा युद्धपोत, लडाकु विमान, मरीन फोर्स, जासुसी विमान, बमवर्षक र ड्रोनहरू तैनाथ गर्दै आएको छ । विश्वकै सबैभन्दा ठूलो युद्धपोतसमेत त्यहाँ तैनाथ गरिएको छ ।
राष्ट्रपति ट्रम्पले भेनेजुएलाका राष्ट्रपति निकोलस मादुरोलाई “लागूपदार्थ तस्करी सङ्गठनका नेता” भएको आरोप लगाउँदै आएका छन् ।
तर मादुरोले भने यसलाई अस्वीकार गरेका छन् । भेनेजुएलाका महान्यायाधिवक्ताले अमेरिकाले भेनेजुएलाका प्राकृतिक स्रोतहरू जस्तै सुन, तेल र तामाको भण्डार—हात पार्ने उद्देश्य राखेको आरोप लगाएका छन् ।
अमेरिकाले सन् २०२४ मा भेनेजुएलामा भएको निर्वाचनलाई स्वतन्त्र र निष्पक्ष नभएको भन्दै मादुरोलाई वैधानिक राष्ट्रपति मान्न अस्वीकार गर्दै आएको छ ।