अफगानिस्तानमा तालिबान सरकारले लगायो इन्टरनेटमा प्रतिबन्ध

भवानी प्रसाद पाण्डे

---

प्रकाशित मिति : आश्विन १२, २०८२ सोमबार

अफगानिस्तानमा तालिबान सरकारले देशव्यापी रूपमा इन्टरनेट बन्द गरेको छ। तालिबान सरकारले टेलिकम्युनिकेसन सेवा बन्द गरेर देशलाई इन्टरनेट शटडाउन को अवस्थामा पुर्याएको अन्तर्राष्ट्रिय निगरानी संस्था नेटब्लक्सले जनाएको छ।

अन्तर्राष्ट्रिय सञ्चार संस्थाहरूले राजधानी काबुलस्थित आफ्ना कार्यालयहरूसँग सम्पर्क गुमाएका छन्। मोबाइल इन्टरनेट र स्याटेलाइट टेलिभिजन समेत अवरुद्ध भएको छ। तालिबानले यसबारे आधिकारिक कारण भने सार्वजनिक गरेको छैन। तालिबान अधिकारीहरूले दूरसञ्चार बन्द ‘अर्को सूचना नआएसम्म कायम रहने’ बताएका छन्।

उडानहरू प्रभावित: स्थानीय सञ्चारमाध्यमका अनुसार काबुल विमानस्थलका उडानहरू पनि अवरुद्ध भएका छन्। फ्लाइटराडार २४ का तथ्याङ्कअनुसार मङ्गलबार मात्रै काबुल अन्तर्राष्ट्रिय विमानस्थलमा तय भएका कम्तीमा आठ वटा उडान रद्द भएका छन्।

काबुलका केही व्यक्तिहरूले दिएको जानकारीअनुसार फाइबर अप्टिक इन्टरनेट साँझ बन्द भएको थियो। यसको प्रभाव बैंकिङ सेवा र व्यवसायहरू सुरु भएपछि अझै बढी देखिने बताइएको छ। व्यवसायीहरूले यस्तो प्रतिबन्ध लामो समय रहेमा आफ्नो कारोबार गम्भीर रूपमा प्रभावित हुने चेतावनी दिएका छन्।

खसोखास निशुल्क सब्सक्राइब गर्नुहोस् 🙏

अब तपाईँले अमेरिकी भिसा, ग्रीनकार्ड लगायत सम्पूर्ण अध्यागमन अद्यावधिकहरू तथा आवास, कर, स्वास्थ्य सेवा लगायतका विषयमा सूचना र स्रोतहरू छुटाउनु पर्नेछैन। ती सबै सिधै तपाईँको इनबक्समा प्राप्त गर्नुहुनेछ।

इमेल ठेगाना यहाँ प्रविष्ट गर्नुहोस्…

सब्सक्राइब गर्न यहाँ क्लिक गर्नुहोस्

नेटब्लक्सले सामाजिक सञ्जाल मास्टोडनमा पोस्ट गर्दै लेखेको छ, “अफगानिस्तान अहिले पूर्ण इन्टरनेट ब्ल्याकआउटको बीचमा छ। तालिबान सरकारले नैतिकता नीतिका लागि विभिन्न नेटवर्कहरूलाई चरणबद्ध रूपमा काट्दै गइरहेको छ। टेलिफोन सेवाहरू समेत प्रभावित छन्।”

यो इन्टरनेट ब्ल्याकआउट तालिबानले लगाउँदै आएका प्रतिबन्धहरूको पछिल्लो कडी हो। सन् २०२१ मा सत्तामा फर्किएपछि तालिबानले इस्लामिक शरिया कानून लागू गर्ने क्रममा थुप्रै प्रतिबन्ध लगाउँदै आएको छ। यसअघि उनीहरूले महिलाद्वारा लेखिएका पुस्तक विश्वविद्यालयको पाठ्यक्रमबाट हटाएका थिए र मानवअधिकार तथा यौन दुर्व्यवहारसम्बन्धी पढाइ समेत प्रतिबन्ध लगाएका थिए।

महिला र किशोरीहरू अझ बढी प्रभावित छन्। उनीहरूलाई १२ वर्षपछि शिक्षा लिन प्रतिबन्ध छ। सन् २०२४ को अन्त्यतिर दाइमी उपचारका लागि हुने मिडवाइफरी कोर्स समेत बन्द गरेर उनीहरूको अन्तिम तालिम लिने बाटो पनि काटिएको छ।

केही हप्तादेखि नै अफगान प्रान्तका बासिन्दाहरूले ढिलो इन्टरनेट वा पूर्ण अवरोधको गुनासो गर्दै आएका थिए। तालिबानले वैकल्पिक इन्टरनेट पहुँच उपलब्ध गराउने भनेको भए पनि यसको विस्तृत विवरण भने दिएको छैन।