ट्रम्प-पुटिन भेटको तयारी अन्तिम चरणमा, युक्रेनी राष्ट्रपति जेलेन्स्कीलाई समावेश गर्ने सम्भावना
प्रकाशित मिति : श्रावण २२, २०८२ बिहीबार
रूसी राष्ट्रपति भ्लादिमिर पुटिन र अमेरिकी राष्ट्रपति डोनाल्ड ट्रम्पबीच अर्को हप्ताभित्र उच्चस्तरीय भेटवार्ता हुने सम्भावना बढेको छ । क्रेमलिनले बिहीबार दुबै नेता निकट भविष्यमा भेट्ने सहमतिमा पुगेको जानकारी दिएको हो ।
यद्यपि पुटिनले भने सम्भावनाको ढोका खुला राख्दै केवल पारस्परिक चासो रहेको बताए। उनले संयुक्त अरब इमिरेट्स (यूएई)मा भेट हुन सक्ने संकेत गरेका छन् ।
यो भेट यति मात्रमा सीमित नरहने संकेत ह्वाइट हाउसबाट आएको छ। अमेरिकी अधिकारीहरूले ट्रम्प–पुटिन भेटपछि युक्रेनी राष्ट्रपति भोलोदीमिर जेलेन्स्कीलाई पनि समावेश गरी त्रिपक्षीय शान्ति सम्मेलन आयोजना गर्ने तयारी भइरहेको खुलासा गरेका छन् ।
तर, पुटिन यस योजनामा उत्साहित देखिएका छैनन्। युक्रेनी पक्षले आशंका व्यक्त गर्दै पुटिन ट्रम्पको धारणा परिवर्तन गराउने रणनीति अपनाउँदै गरेको बताएको छ ।
पुटिनका सल्लाहकार युरी उशाकोभले भने स्थान तय भइसकेको र अन्य विवरणहरूमा छलफल भइरहेको बताएका छन्।
पुटिनले जेलेन्स्कीलाई भेट्न अस्वीकार नगरे पनि “उपयुक्त अवस्था सिर्जना गर्नुपर्ने” बताएका छन्।
अमेरिकी राष्ट्रपति ट्रम्पले यस विषयमा आशावादी टिप्पणी गर्दै भनेका छन्, “पुटिन र जेलेन्स्की छिट्टै भेट्न सहमत हुने सम्भावना बलियो छ।” तर उनले सँगै चेतावनी पनि दिए – “म यसमा पहिले निराश भइसकेको छु।”
ट्रम्पले भारतमाथि रूसी तेल खरिदका कारण लगाइएको भन्सार शुल्क दोब्बर गर्दै ५० प्रतिशत पुर्याउने घोषणा पनि गरेका छन्। साथै, शुक्रवारसम्म थप माध्यमिक प्रतिबन्धहरू रूसमाथि लाग्ने जानकारी अमेरिकी अधिकारीहरूले दिएका छन्।
अर्कोतर्फ युक्रेनी राष्ट्रपति जेलेन्स्कीले टेलिग्राममा भिडियो सन्देश दिँदै भनेका छन्, “पुटिन युद्धविरामतर्फ झुकिएको देखिन्छ, जसले प्रमाणित गर्छ कि रूसमाथिको अन्तर्राष्ट्रिय दबाब प्रभावकारी भएको छ।”
तर, उनले सावधानी अपनाउँदै भने – “हामीलाई धोका नदिनु महत्त्वपूर्ण छ।”
अहिलेसम्मको संकेतले ट्रम्प–पुटिन भेट सम्भव देखिए पनि त्रिपक्षीय सम्मेलनको विषय अझै स्पष्ट छैन। अमेरिकी विदेशमन्त्री मार्को रुबियोले भने, “अझै धेरै अवरोध छन्, तर हामी छिट्टै समाधानको नजिक पुग्ने आशामा छौं।”