पर्यटक र व्यवसायिक भिसामा अमेरिका जान चाहनुहुन्छ ? अब १५ हजार डलरसम्म धितो पनि चाहिन्छ !
प्रकाशित मिति : श्रावण १९, २०८२ सोमबार
अमेरिकी विदेश मन्त्रालयले नयाँ नियम प्रस्ताव गर्दै केही व्यवसायिक तथा पर्यटक भिसा आवेदकहरूलाई अमेरिका प्रवेश गर्नुपूर्व अधिकतम १५ हजार अमेरिकी डलरसम्मको धितो राख्नुपर्ने व्यवस्था ल्याउने तयारी गरेको छ।
मन्त्रालयले मंगलबार फेडेरल रजिस्टरमा प्रकाशित गर्न लागेको सूचना अनुसार, उच्च भिसा ओभरस्टे दर भएका र कमजोर आन्तरिक कागजात सुरक्षा भएका देशहरूबाट आउने आवेदकहरूलाई लक्षित गरी १२ महिनाको परीक्षण कार्यक्रम सञ्चालन गरिनेछ। यो योजनाअनुसार भिसा आवेदन गर्दा ५ हजार अमेरिकी डलर, १० हजार अमेरिकी डलर वा १५ हजार अमेरिकी डलरको धितो राख्नुपर्ने हुन सक्छ।
यो नियम प्रकाशन भएको १५ दिनभित्र लागू हुने जनाइएको छ। अमेरिकी सरकारका अनुसार, यस्तो व्यवस्था ल्याउनुको उद्देश्य भनेको आगन्तुकहरूले भिसाको सर्त उल्लंघन गरेमा सरकारलाई लाग्ने सम्भावित खर्चबाट जोगाउनु हो।
यद्यपि, आलोचकहरूले भने यस्तो प्रस्तावले धेरै सामान्य नागरिकहरूको लागि अमेरिका प्रवेशको प्रक्रिया झनै कठिन र खर्चिलो बनाउने टिप्पणी गरेका छन्।
विदेश मन्त्रालयले परीक्षण कार्यक्रमलाई अस्थायी कदमको रूपमा व्याख्या गरे पनि यसको दीर्घकालीन प्रभाव र सम्भावित आलोचनालाई लिएर बहस सुरु छ।