रुसमा ५०० वर्षपछि ज्वालामुखी विस्फोट,सुनामीको चेतावनी
प्रकाशित मिति : श्रावण १८, २०८२ आईतबार
रुसको पूर्वी सुदूर क्षेत्रस्थित क्रासेनेनिकोभ ज्वालामुखी विस्फोट भएको छ । यो विस्फोट करिब ५०० वर्षपछि पहिलोपटक भएको हो ।
विज्ञहरूका अनुसार यो विस्फोट गत साता आएको शक्तिशाली भूकम्पसँग सम्बन्धित हुन सक्छ ।
कामचाट्का प्रायद्वीपमा रहेको यो ज्वालामुखीले रातभरमा करिब ६ किलोमिटर अग्लो खरानीको मुस्लो आकाशमा फ्याँकेको छ । रुसको आपतकालीन मन्त्रालयले बस्ती क्षेत्रहरूलाई कुनै खतरा नरहेको बताएको छ ।
यस विस्फोटपछि केही घण्टामै अर्को ठूलो भूकम्प पनि रुसमै आएको छ । जसका कारण कामचाट्काका तीन क्षेत्रहरूमा सुनामीको चेतावनी जारी गरिएको छ।
यी दुवै घटना गत साता आएको ८.८ म्याग्निच्युडको शक्तिशाली भूकम्पसँग सम्बन्धित हुन सक्ने अनुमान गरिएको छ ।
उक्त भूकम्पका कारण फ्रेन्च पोलिनेसिया र चिलीसम्म सुनामी चेतावनी जारी गरिएको थियो।
रुसी समाचार संस्थाका अनुसार, क्रासेनेनिकोभ ज्वालामुखीको विस्फोटपछि खिचिएका तस्वीरहरूमा विशाल खरानीको मुस्लो देखिन्छ । तस्वीरहरू सम्भवतः हेलिकप्टरबाट खिचिएका हुन्।
रुसी विज्ञहरूले बुधबारको भूकम्पपछि केही हप्तासम्म बलिया परकम्पहरू आउन सक्ने चेतावनी दिएका थिए। उक्त भूकम्प रूसमा हालसम्मकै शक्तिशालीमध्ये एक मानिएको छ । जसका कारण लाखौं मानिसहरूलाई सुरक्षित स्थानमा सारिएको थियो।
आइतवार आएको ७ म्याग्निच्युडको अर्को भूकम्प कुरिल द्वीप समूहमा केन्द्रित थियो । यसका कारण १८ सेन्टिमिटर अग्ला छालहरू आउने सम्भावना रहेको रुसको आपतकालीन मन्त्रालयले जनाएको छ।
यद्यपि छालहरूको उचाइ कम भए पनि तीनवटा क्षेत्रका मानिसहरूलाई “किनाराबाट टाढा बस्न” अनुरोध गरिएको छ।
क्रासेनेनिकोभको अन्तिम विस्फोट १५ औं शताब्दीमा भएको थियो । हालको विस्फोट गत साता आएको ८.८ म्याग्निच्युडको भूकम्पसँग सम्बन्धित हुनसक्ने बताइएको छ।
कामचाट्का प्रायद्वीप दुर्गम भए पनि यो “प्यासिफिक रिङ अफ फायर” मा पर्छ । विश्वकै सबैभन्दा धेरै भूकम्प र ज्वालामुखी विस्फोटहरू हुने क्षेत्रमा यो पर्दछ ।