इजरायलद्वारा सिरियामाथि आक्रमण, झडप चाँडै अन्त्य हुने अमेरिकाको अपेक्षा
प्रकाशित मिति : असार ३२, २०८२ बुधबार
इजरायली सेनाले सिरियामा आक्रमण गरेको छ । राजधानी दमास्कसमा रहेको रक्षा मन्त्रालय र दक्षिणी सिरियामा रहेका सरकारी सैन्य ठाँउहरूमा इजरायली सेनाले हवाई आक्रमण गरेको हो ।
यो आक्रमण स्वेइदा प्रान्तमा चौथो दिनसम्म जारी घातक साम्प्रदायिक झडपको बीचमा भएको हो । प्रधानमन्त्री बेन्जामिन नेतन्याहूले ड्रुज दाजुभाइहरूलाई बचाउन र शासनका गिरोहहरूलाई समाप्त गर्न काम गरिरहेको बताएका छन ।
सिरियाको विदेश मन्त्रालयले इजरायली कारबाहीलाई “विश्वासघाती आक्रमण” भन्दै कडा आलोचना गरेको छ। आइतबारदेखि स्वेइदामा ड्रुज मिलिसिया र बेदुइन जातीय समूहबीचको हिंसात्मक झडपमा हालसम्म ३०० भन्दा बढी व्यक्तिको मृत्यु भइसकेको छ।
सिरियाली सञ्चार माध्यमका अनुसार सिरियाली सेना स्वेइदा शहरबाट फिर्ता हुन थालेको छ । यो फिर्ती स्वेइदाका धार्मिक नेताहरूसँग सरकारले गरेको सहमतिको भाग हो ।
इजरायली सेनाले सोमबारदेखि स्वेइदा र आसपासका क्षेत्रमा सिरियाली सुरक्षाफौज र उनीहरूको हतियारलाई लक्ष्य बनाउँदै आक्रमण थालेको हो ।
मानवअधिकार निगरानी संस्थाका अनुसार स्वेइदामा मानवीय अवस्था बिग्रिएको छ।
स्वेइदाको राष्ट्रिय अस्पतालमाथि ट्याङ्कले आक्रमण गरेपछि त्यहाँ उपचाररत घाइतेहरूमा भय व्याप्त भएको थियो । पानी र औषधिको चरम अभाव भएको बताइएको छ।
सिरियाको स्वास्थ्य मन्त्रालयले अस्पतालमा सरकारी फौजले ‘अनाधिकृत समूहहरूको फिर्ती’पछि “दर्जनौँ शवहरू” फेला पारेको दाबी गरेको छ ।
ड्रुज समुदाय, जसको धर्म शिया इस्लामसँग सम्बन्धित भए पनि फरक पहिचान र मान्यताहरू सिरियाका कार्यवाहक राष्ट्रपति अहमद अल शराअको शासनप्रति शंकास्पद छन् ।
पछिल्लो ८ महिनामा विभिन्न ठाउँहरूमा भएका साम्प्रदायिक झडपहरूले उनीहरूको चिन्ता झन् बढाएको छ । मे महिनामा पनि दमास्कस र स्वेइदामा ड्रुज, सरकारी फौज, र इस्लामवादी लडाकुबीचको झडपमा दर्जनौँको मृत्यु भएको थियो।
अमेरिकी विदेश मन्त्री मार्को रुबियोले यो अवस्थाप्रति ‘गम्भीर चिन्ता’ व्यक्त गर्दै बुधवार रातिसम्म झडप अन्त्य हुने बताएका छन्। सिरियाको विदेश मन्त्रालयले अमेरिकी र अरब राष्ट्रहरूले जारी राखेको शान्तिपूर्ण प्रयासको स्वागत गरेको छ ।
नेतन्याहूले यसअघि स्वेइदा र दक्षिणका दुई अन्य प्रान्तलाई पूर्ण रूपमा निशस्त्र बनाउनु पर्ने माग गरेका थिए । उनको भनाइमा राष्ट्रपति शराअको सुन्नी इस्लामवादी समूह इजरायलको सुरक्षा लागि खतरा हो।
स्वेइदामा जारी हिंसा र इजरायली हस्तक्षेपले सिरियाको शान्ति प्रक्रिया थप जटिल बनाएको छ। आन्तरिक साम्प्रदायिक तनाव, इजरायली सैन्य आक्रमण, र अन्तर्राष्ट्रिय दबाबबीच सिरियामा मानवीय संकट तीव्र हुँदै गएको देखिन्छ ।