टिकटकप्रति नरम ट्रम्प : बेच्ने समयसीमा सेप्टेम्बरसम्म बढाए, चीनसँग सहमति हुनेमा आशावादी
प्रकाशित मिति : असार ५, २०८२ बिहीबार
अमेरिकी राष्ट्रपति डोनाल्ड ट्रम्पले टिकटकको मूल कम्पनी बाइटडान्सलाई अमेरिकी मालिकलाई बेच्नको लागि दिइएको समयसीमा थप ९० दिन थप गरेका छन्। अब टिकटकलाई बेच्ने वा बन्द गर्ने म्याद सेप्टेम्बर १७, २०२५ सम्म कायम हुनेछ।
राष्ट्रपति ट्रम्पले ट्रुथ सोसलमा पोस्ट गर्दै भने, ‘मैले अहिले कार्यकारी आदेशमा हस्ताक्षर गरें जसले टिकटकलाई बन्द गर्ने म्यादलाई ९० दिन थप गरेको छ।’ उनको सो पोस्टमा कार्यकारी आदेशको प्रतिलिपि समेत संलग्न गरिएको थियो।
ट्रम्प प्रशासनको दबाबमा टिकटक अमेरिकी राष्ट्रिय सुरक्षाको कारण देखाउँदै बिक्री वा बन्द गर्ने निर्णय गरिसकेको थियो। सन् २०२५ को जनवरीमा उक्त निर्णय लागू गर्ने तयारी गरिएको थियो। तर, ट्रम्पले यसअघि नै दुई पटक उक्त म्यादलाई स्थगन गरेका थिए।
ट्रम्पले टिकटकलाई राजनीतिक दृष्टिले पनि प्रयोग गरेका थिए। सन् २०२४ को राष्ट्रपति चुनावमा उनले टिकटकमार्फत अमेरिकी युवावर्गको ध्यान तान्न सफल भएका थिए। त्यसैले उनले टिकटक बन्द गर्नुभन्दा बिक्री गरी अमेरिकी संचालनमै राख्ने योजना बनाएका छन्।
राष्ट्रपति ट्रम्पले चिनियाँ राष्ट्रपति सी जिनपिङसँग सम्झौता हुनेमा आशावादी देखिएका छन्। उनले भने, ‘हामी चाहन्छौं, टिकटक अमेरिकी बजारमा रहोस् । हामी विश्वास गर्छौं, राष्ट्रपति सीले यस्तो सम्झौतालाई समर्थन गर्नुहुनेछ।’
टिकटकले आधिकारिक प्रतिक्रिया दिंदै ट्रम्पप्रति आभार व्यक्त गरेको छ। टिकटकको विज्ञप्तिमा भनिएको छ, ‘राष्ट्रपति ट्रम्पको नेतृत्व र समर्थनप्रति हामी आभारी छौं, जसले गर्दा टिकटक अझै १७ करोडभन्दा बढी अमेरिकी प्रयोगकर्ता र ७५ लाख अमेरिकी व्यवसायहरूका लागि उपलब्ध रहनेछ। हामी उपराष्ट्रपति जेडी भान्सको कार्यालयसँग निरन्तर समन्वयमा छौं।’