इरानमाथि दबाब बढाउन अमेरिकाको अर्को कदम : तेल व्यापारमा कडाइ, ७ संस्थामाथि प्रतिबन्ध
प्रकाशित मिति : बैशाख १७, २०८२ बुधबार
अमेरिकाले इरानको अवैध पेट्रोलियम र पेट्रोकेमिकल व्यापारमा संलग्न रहेको आरोपमा सात संस्थामाथि प्रतिबन्ध लगाएको छ। यो कदम आगामी शनिबार रोममा हुने अमेरिका-इरान वार्ताको नयाँ चरण अघि तेहरानमाथि दबाब बढाउनका लागि चालिएको हो।
अमेरिकी विदेश मन्त्रालयका अनुसार संयुक्त अरब इमिरेट्स, टर्की र इरानमा आधारित यी संस्थाहरूले इरानी पेट्रोलियम र पेट्रोकेमिकल उत्पादनको व्यापार गरेको आरोप छ। साथै, दुई जहाजलाई पनि प्रतिबन्धको निशानामा राखिएको छ। अमेरिकी विदेशमन्त्री मार्को रुबियोले यो कारबाहीले सयौं मिलियन डलर मूल्यका इरानी पेट्रोकेमिकलका चार बिक्रेता र एक खरिदकर्तालाई लक्षित गरेको बताए।
राष्ट्रपति डोनाल्ड ट्रम्पले आफ्नो ‘अधिकतम दबाब’ अभियानलाई पुनर्स्थापित गरेपछि यो पछिल्लो कदम हो, जसको उद्देश्य इरानको तेल निर्यातलाई शून्यमा झार्ने र तेहरानलाई आणविक हतियार विकास गर्नबाट रोक्ने रहेको छ। ‘राष्ट्रपति इरानको अवैध तेल र पेट्रोकेमिकल निर्यात, विशेषगरी चीनमा हुने निर्यातलाई शून्यमा झार्न प्रतिबद्ध छन्’, रुबियोले भने।
अमेरिका र इरानबीच आणविक कार्यक्रमलाई लिएर वार्ता पुनः सुरु भएको समयमा अमेरिकाले यस्तो कारबाही गरेको हो । सन् २०१५ मा भएको आणविक सम्झौताबाट ट्रम्पले आफ्नो पहिलो कार्यकालमा अमेरिकालाई फिर्ता लिएका थिए, जसले इरानको युरेनियम संवर्धनमा कडा सीमा लगाएर प्रतिबन्ध हटाउने व्यवस्था गरेको थियो। त्यसयता, इरानले युरेनियम संवर्धनको सीमालाई उल्लंघन गर्दै आएको छ।
पश्चिमी राष्ट्रहरूले इरानमाथि आणविक हतियार विकासको गोप्य योजना भएको आरोप लगाउँदै आएका छन्, जबकि इरानले आफ्नो आणविक कार्यक्रम नागरिक ऊर्जा उत्पादनका लागि मात्र भएको दाबी गर्छ। न्यूयोर्कस्थित संयुक्त राष्ट्रसंघमा इरानको मिसनले यसबारे तत्काल कुनै टिप्पणी गरेको छैन।