गौतमबुद्ध अन्तर्राष्ट्रिय विमानस्थलबाट एक महिनामा ११५ उडान, ६ हजार ८ सय बढी यात्रु आवागमन
गौतमबुद्ध अन्तर्राष्ट्रिय विमानस्थल भैरहवा (रुपन्देही), १४ माघः भैरहवास्थित गौतमबुद्ध अन्तर्राष्ट्रिय विमानस्थल । अहिले यहाँबाट फ्लाई दुबई–नेपाल एयरलाइन्सले अन्तर्राष्ट्रिय उडान गरिरहेकोे छ । तस्बिरः राधेश्याम विश्वकर्मा÷रासस
रुपन्देहीको भैरहवास्थित गौतमबुद्ध अन्तर्राष्ट्रिय विमानस्थलबाट एक महिनामा ६ हजार ८७९ यात्रुको आवागमन भएको छ ।
विमानस्थलका महाप्रबन्धक प्रतापबाबु तिवारीका अनुसार फेब्रुअरी महिनामा कुल ११५ उडान अवतरणमार्फत ती यात्रुको आगमन भएको हो । यसमध्ये फ्लाई दुबईबाट दुई हजार ४०३, जजिरा एयरवेजबाट तीन हजार २६५ र थाई एयर एसियाबाट एक हजार ९७ यात्रुको आवागमन भएको थियो ।
त्यस्तै नेपाल एयरलाइन्सका एक र अन्य १३ चार्टर उडानबाट २११ यात्रुको आवागमन भएको विमानस्थल कार्यालयले जनाएको छ । त्रिभुवन विमानस्थलसँग जोडिएर उडान गर्ने नेपाल एयरलाइन्स र फ्लाई दुबईमा चार हजार ४० ट्रान्जिट यात्रुले हवाई यात्रा गरेका थिए ।
विमानस्थलमा पछिल्लो समय नियमित उडान भइरहेको र यसले विमानस्थललाई चलायमान बनाएको महाप्रबन्धक तिवारीले बताएका छन् ।