गतबर्ष अध्ययनका लागि अमेरिका आएका २१ बर्षका कोशलको साथीलाई बचाउन खोज्दा डूबेर मृत्यु
प्रकाशित मिति : श्रावण ३२, २०८१ शुक्रबार
गबर्षमात्र अध्ययनका लागि अमेरिका आएका २१ बर्षका कोशल पराजुलीको डुब्न लागेका साथीलाई बचाउन खोज्दा आफै डूबेर मृत्यु भएको छ । ओक्लाहोमामा रहेको टर्नर फल्सपार्कमा पौडी खेल्ने क्रममा उनले पानीमा डुव्न लागेको साथीलाई बचाउने प्रयास गरेका थिए ।
रुपन्देहीको मणिग्रामबाट विद्यार्थी भिसामा अमेरिकाको अलावामामा आएका उनी ३ हप्ताअगाड़ी मात्र पढ़ाईको क्रममा टेक्ससमा बसाई सरेका थिए । उनीहरु सोमबार बेलुका टर्नर फल्सपार्कमा गएका थिए । पाल्पाको दर्पुकबाट मणिग्राम बसाई सरेका पशुपति पराजुली र सपना पराजुलीका छोरा कोशलको मृत्युसँगै एउटा सपनाको दुखद अन्त्य भएको छ ।
कोशलको अन्तिम संस्कार लगायतका कार्यहरु सम्पन्न गराउनका लागी आर्थिक सहयोगको आवश्यकता भएकाले सहयोग जुटाउन गोफण्डमीमा अभियान सुरु गरिएको छ । कमल पोखरेल र परिवारका तर्फबाट सुरु गरिएको गोफण्डमीमा सहयोग गर्न सबैलाई अनुरोध गरिएको छ ।
यदि तपाई पनि सहयोग गर्न चाहनुहुन्छ भने यहाँ क्लीक गर्नुहोला ।
पाँचजना साथीहरु मिलेर पौडी खेल्ने क्रममा उक्त घटना भएको जनाइएको छ । डूबेकी नेपाली विद्यार्थी झापाकी सुरक्षा घिमिरेको अस्पतालमा उपचार भइरहेको जनाइएको छ । घटना सोमबार बेलुका ८ बजेर ३२ मिनेटमा भएको जनाइएको छ । डेभिस प्रहरी र मुरे काउन्टीको ईएमएस एकजना डुबेको जानकारी पाएर घटनास्थलमा पुग्दा दुईजना डुबेको थाहा पाएका थिए ।
डुबेकी महिलालाई परिवारका सदस्यहरू र देखेका अन्यले पानीबाट बाहिर निकालेका थिए । त्यसपछि ईएमएसले उनको उद्दार गरेका थिए । डेभिस फायर डिपार्टमेन्टका सदस्यहरू कोशललाई खोज्न पानीमा प्रवेश गरेका थिए । उनीहरु आएको १५ मिनेटमै ८ फिट तल पानीबाट कोशलको उनको शव निकालिएको थियो ।
उनी करिब २५ मिनेटसम्म पानीमुनि रहेको अनुमान गरिएको थियो । उनलाई पुनर्जीवित गर्ने प्रयास गरिएको थियो तर उक्त प्रयास सफल हुन सकेन । उनलाई मुर्रे काउन्टी ईएमएसले राति ९ बजेतिर मृत घोषणा गरेको थियो। उनीहरु पौडी खेल्न टर्नर फल्स पार्कमा बन्द गरिएको पौडी क्षेत्रमा गएको डेभिस फायर डिपार्टमेन्टले जनाएको छ ।