अमेरिकाको भर्जिनियाबाट २ सातादेखि बेपत्ता नेपाली नर्स ममता काफ्लेबारे प्रहरीबाट थप अपडेट जारी
प्रकाशित मिति : श्रावण ३१, २०८१ बिहीबार
बेपत्ता नर्स ममता काफ्ले
अमेरिकाको भर्जिनियाबाट २ सातादेखि बेपत्ता नेपाली नर्स ममता काफ्लेबारे प्रहरीले थप अपडेट जारी गरेको छ । अमेरिकाको भर्जिनिया मनाससबाट जुलाई ३१ देखि बेपत्ता नेपाली ममता काफ्लेको खोजी गरिरहेको मनासस पार्क पुलिस डिपार्टमेन्टले अपडेट जारी गरेको हो ।
प्रहरीले ममता काफ्ले खोजीमा सघाउन सर्वसाधारणहरुलाई आग्रह गर्दै अगस्ट २ मा प्रहरी अधिकारीहरूले ममता काफ्लेको घरमा उनको कल्याणको जाँचको लागि पुगेको र उनका श्रीमान नरेश भट्टसँग कुरा गरेको जानकारी दिएको छ । श्रीमान नरेश भट्ट त्यतिबेला थप जानकारी उपलब्ध गराएपनि उनी हराएको रूपमा रिपोर्ट गर्न भने नचाहेको प्रहरीले बताएको छ ।
अगस्ट ५ मा मात्र भट्टले प्रहरीलाई सम्पर्क गरी ममता काफ्ले हराएको जानकारी दिएको प्रहरीको भनाई छ । घटनाको अनुसन्धान गर्दा अधिकारीहरूले प्रारम्भमा ममता बेपत्ता व्यक्तिको लागि भर्जिनिया राज्य प्रहरीको मापदण्ड पूरा नगर्ने निर्धारण गरेका थिए ।
अधिकारीहरूले त्यसपछि मानक अपरेटिङ प्रक्रियाहरू अनुसरण गरेर ममतालाई भर्जिनिया राज्य पुलिसमा हराएको व्यक्तिका रूपमा प्रविष्ट गराएका थिए । जसले राज्यव्यापी हराएको व्यक्तिको सूची सञ्चालन गर्छ । त्यसपछि अधिकारीहरुले उनको बेपत्ताको अनुसन्धान जारी राखेको प्रहरीले जनाएको छ ।
भर्जिनिया राज्य प्रहरीले ममताको खोजीमा मद्दत गर्न सबै भर्जिनिया र अन्य अमेरिकी प्रहरी एजेन्सीहरूलाई सूची वितरण गरेको जनाएको छ । अगस्ट ५ देखि ८ को बीचमा विस्तृत अनुसन्धान गर्दा ममताले पछिल्लो दिनमा आफ्नो परिवारका सदस्यहरु, साथीहरू, रोजगारदातालाई कममात्र सम्पर्क गरेको तथा सामाजिक सञ्जाल पोस्टिङहरू पनि कम गरेको पत्ता लगाएको प्रहरीले जनाएको छ ।
यो र अन्य परिस्थितिहरूलाई ध्यानमा राख्दै प्रहरीले उनको हराएको स्थितिलाई अनैच्छिक र गम्भीर रुपमा हराएको व्यक्तिका रुपमा निर्धारण गरेको र थप स्रोतहरू अनुसन्धानको लागि खर्च गरेको जनाएको छ । प्रहरीले बेपत्ता व्यक्ति फ्लायरलाई सार्वजनिक गरेको जनाउदै जुलाई २७ मा काफ्ले युभीए हेल्थ प्रिन्स विलियम मेडिकल सेन्टरमा देखिएको, जुलाई २८ मा साथीसँग कुरा गरेको र जुलाई ३१ मा उनका श्रीमानले अन्तिमपटक देखेको प्रहरीले जनाएको छ ।
उनीबारे कुनै जानकारी भएमा मनासस पार्क पुलिसको फोन नम्बर ७०३ ३६१ ११३६ मा सम्पर्क गर्न अनुरोध गरिएको छ । गोप्यरुपमा पनि ७०३ ३३० ०३३० मा सम्पर्क गरेर जानकारी गराउन सकिनेछ । अधिकारीहरुले घटनाको सक्रियताका साथ अनुसन्धान गरिरहेका र विभागले यस मामलामा जानकारी उपलब्ध हुने बित्तिकै अद्यावधिकहरू प्रदान गर्ने प्रहरीले जनाएको छ ।
हराइरहेकी २८ बर्षीया ममता काफ्लेको ५ फिट उचाई, १३२ पाउण्ड तौल, कालो कपाल र गाढा खैरो आँखा भएको प्रहरीले व्याख्या गरेको छ । काभ्रेकी काफ्ले अमेरिकाको भर्जिनियामा रजिष्टर्ड नर्सका रुपमा कार्यरत रहेको उनको सामाजिक सञ्जाल प्रोफाइलमा उल्लेख रहेको छ ।
उनले अन्तिमपटक जुलाई २८ मा सामाजिक सञ्जालमा पोष्ट गरेको देखिएको छ । उनका श्रीमान नरेश भट्टले पनि सामाजिक सञ्जालमार्फत ममताको खोजीमा सघाउन अनुरोध गरेका छन् । अमेरिकामा नेपाली समुदायका तर्फबाट ममता सकुशल फेला पर्ने अपेक्षा र कामना गर्दै सामाजिक सञ्जालमा पोष्ट गरिएको छ ।
यसैबीच एक गैर नाफामुलक संस्थाले ममता काफ्लेको खोजीमा सहयोग पुर्याउने कुनै पनि गोप्य जानकारीहरुका लागि ५ हजार डलर पुरस्कारको घोषणा गरेको छ । कुनै जानकारी भएमा सम्बन्धित अधिकारीहरूलाई सम्पर्क गर्नुहोस् वा गोप्य रूपमा सुझावहरू पेश गर्न क्युआर कोड प्रयोग गर्न सुझाव दिइएको छ । जानकारी जतिसुकै सानो भएतापनि ममता काफ्लेलाई फेला पार्न महत्त्वपूर्ण हुनसक्ने भन्दै यस्तो आग्रह गरिएको हो ।