बाल्टिमोरमा कार दुर्घटनामा घाइते लिलुराम पौडेल र काँशीराम खत्री आईसीयुमा, सहयोगको अपिल
प्रकाशित मिति : श्रावण ३०, २०८१ बुधबार
बाल्टिमोरमा कार दुर्घटनामा घाइते लिलुराम पौडेल र काँशीराम खत्रीको उपचारका लागि सघाउन आर्थिक सहयोग अभियान सुरु गरिएको छ । बाल्टिमोर एसोसियसन अफ नेपलिज इन अमेरिकाले बाग्लुङ समाज अमेरिकासँगको सहकार्यमा गोफण्डमीमा अभियान सुरु गरेको हो ।
अगस्त १ को राती बाल्टिमोरमा भएको कार दुर्घटनामा लिलुराम पौडेल र उनका ससुरा काँशीराम खत्री गम्भीर घाइते भएका थिए । दुबैजनाको बाल्टिमोरमा रहेको साइनाई अस्पतालको आईसीयुमा उपचार भइरहेको छ । दुबैजना जीवनका लागि संघर्ष गरिरहेको उल्लेख गर्दै सहयोगको अपिल गरिएको हो ।
लिलुराम पौडेल परिवारका मुख्य आर्थिक अभिभावक हुन् । उनको परिवारमा उहाँकी पत्नी माया खत्रीका साथै ८ र ५ बर्षका दुई छोरीहरू छन् । यो दुखद दुर्घटनाले परिवारमा शारीरिक मात्र नभई आर्थिक कठिनाइको पहाड खडा गरेको छ। माया खत्रीले अब घाइते श्रीमान्, ससुरा र दुई सन्तानको हेरचाह गर्नुपर्ने भएकाले काम गर्न सम्भव नभएको गोफण्डमीमा उल्लेख गरिएको छ ।
तपाई पनि सहयोग गर्न चाहनुहुन्छ भने यहाँ क्लीक गर्नुहोला ।
गोफण्डमीमा भनिएको छ – ‘यसले परिवारलाई अत्यन्तै गम्भीर आर्थिक संकटमा धकेलेको छ। यो संकटको प्रतिकार गर्न पौडेल परिवारलाई सहयोगका लागि अभियान सुरु गरिएको छ। यस अभियानको उद्देश्य बढ्दो मेडिकल खर्चलाई धान्न र यो कठिन समयमा परिवारलाई केही आर्थिक राहत प्रदान गर्नु हो। हामी तपाईँलाई सक्दो सहयोग गर्न हार्दिक अनुरोध गर्दछौं।’
आर्थिक सहयोग वा अपीललाई शेयर गर्न आग्रह गर्दै भनिएको छ – ‘तपाईको सानो सहयोगले पनि ठूलो प्रभाव पार्न सक्छ। यस चुनौतीपूर्ण समयमा हामी सबैले एकसाथ आएर पौडेल परिवारलाई सघाउने समय आएको छ। तपाईँको दयालुपन र उदारताले वास्तवमै ठूलो परिवर्तन ल्याउन सक्छ।’