त्रिशूलीमा हराएको चुम्बक भेटियो , बस अझै भेटिएनन
प्रकाशित मिति : श्रावण १३, २०८१ आईतबार
बस खोज्न प्रयोग भएको चुम्बक फेला परेको छ । गत असार २८ गतेदेखि हराइरहेको दुईवटा यात्रुवाहक बस खोज्न त्रिशूलीमा चुम्बक प्रयोग भएको थियो । चितवनको काभ्रेघाटस्थित नारायणी नदीमा चुम्बक र ट्युब फेला परेका हुन ।
बस खोज्न प्रयोग गरिएको चुम्बक र ट्युब नै हराएको थियो । लाइफ ब्वाई ट्युब पानीमा मानिस डुबेको बेला उद्धारको लागि प्रयोग गरिन्छ ।
नदीभित्र हालेर बस खोज्न प्रयोग भएको १९ किलोको चुम्बक हराएको थियो । बस खोज्न भारतबाट दुइटा चुम्बक ल्याइएको थियो ।
१९ किलो र १४ किलोको दुइवटा चुम्बक पानीमा खसालेर बेपत्ता बसको खोजी सुरू गरिएको थियो । त्यस क्रममा चुम्बकसँगै लाइफ ब्वाई ट्युब समेत पानीले बगाएको थियो ।
हराएको चुम्बक र ट्युब सोमबार भेटिएको चितवनका प्रमुख जिल्ला अधिकारी इन्द्रदेव यादवले जानकारी गराउनु भयो ।
त्रिशूली नदीमा हराइरहेको बस खोज्न भारतबाट आएको उद्धार टोली भने आइतबार नै फर्किसकेको छ । नेपाली सुरक्षाकर्मीले भने खोजतलास जारी राखेका छन्।
असार २८ गते बिहान साढे ३ बजेतिर त्रिशूली नदीमा दुईवटा बस खसेपछि दुइटा बसमा ६५ जना यात्रु बेपत्ता भएका थिए । उनीहरूमध्ये हालसम्म १९ जनाको शव फेला परेको छ ।