न्युयोर्कमा जुलाई ४ को फायरवर्क्स एक दशकमा पहिलो पटक हडसनबाट सुरु हुने
प्रकाशित मिति : जेष्ठ २१, २०८१ सोमबार
आगामी जुलाई ४ मा न्युयोर्कमा हुने फायरवर्क्स लामो समय इस्ट रिभरबाट गरिदै आएकोमा यस वर्ष म्यानहट्टनको हडसन रिभर साइडमा फर्किँदैछ । जसका कारण अमेरिकाको सबैभन्दा ठूलो स्वतन्त्रता दिवस उत्सव हेर्नको लागि यो बर्ष नयाँ स्थानहरु खुल्ने भएका छन् ।
यसपटक म्यानहट्टनमा वेष्ट १४ देखि वेष्ट ३४ सम्ममात्र नभई न्यु जर्सीबाट समेत फायरवर्क्स हेर्ने अवसर प्रदान गर्दै हडसन नदीको छेउमा अवस्थित बार्जहरूबाट फायरवर्क्स सुरु हुनेछ। यस वर्षको फायरवर्क्स प्रदर्शनले एक दशकभन्दा बढी समयमा पहिलो पटक हडसन नदीबाट देशभक्तिको रङ, प्रकाश र ध्वनिको प्रेरणादायी दृष्य प्रक्षेपण गर्ने मेसीको ४ जुलाई फायरवर्क्सका कार्यकारी निर्माता विल कोसले एक प्रेस विज्ञप्तिमा बताएका छन् ।
गत वर्ष त्यस्तो प्रकारको पहिलो ड्रोन प्रदर्शन पछि टोलीले यो बर्ष दर्शकहरुलाई आश्चर्यचकित गर्ने र खुसी पार्न नयाँ तरिकाहरू विकास गर्न कडा मेहनत गरेको जनाइएको छ । यस वर्ष न्यु जर्सीले पनि फेरि प्राइम आतिशबाजी अवलोकनमा प्रवेश गर्नेछ।
न्यु जर्सी हडसन भरिका छिमेकीहरूसँगको सहकार्यमा योजनाबद्ध फायरवर्क्सको चम्किलो प्रदर्शनको साथ यस वर्षको स्वतन्त्रता दिवस मनाउन पाउँदा गर्व गर्ने न्युजर्सीका गभर्नर फिल मर्फीले बताएका छन् । कैयन बर्षमा पहिलो पटक मेसीको ४ जुलाईको फायरवर्क्सले हडसन नदीमाथि न्युजर्सीको आकाशलाई पनि उज्यालो पार्नेछ।
वार्षिक फायरवर्क्स प्रदर्शन सन् १९७६ देखि न्यूयोर्क शहर परम्परा भएको छ। यस वर्षको शो बारे थप विवरणहरू, हेर्ने स्थानहरू र समय सहितका विवरण आगामी हप्ताहरूमा घोषणा गरिने जनाइएको छ ।