आफ्ना नागरिकहरुलाई २१ वटा देशको यात्रा नगर्न अमेरिकाको चेतावनी
प्रकाशित मिति : पुस १८, २०८० बुधबार
Photo: Global Residence Index
आफ्ना नागरिकहरुलाई विभिन्न २१ वटा देशको यात्रा नगर्न अमेरिकाको विदेश मन्त्रालयले चेतावनी दिएको छ । ती देशहरुका सन्दर्भमा विदेश मन्त्रालयले चौथो लेभलको यात्रा सुझाव जारी गरको हो । यात्रा गर्न नहुने कारणहरु भने विभिन्न प्रकारका छन् ।
यात्रा नगर्न चेतावनी दिएका देशहरुमा अफगानिस्तान, बेलारुस, बुर्किना फासो, बर्मा, मध्य अफ्रिकी गणतन्त्र, हाइटी, इरान, इराक, लेबनान, लिबिया, माली, नाइजर, उत्तर कोरिया, रसिया, सोमालिया, दक्षिण सुडान, सुडान, सिरिया, युक्रेन, भेनेजुएला र यमन रहेका छन् ।
अमेरिकाले आफ्ना नागरिकहरुका लागि विभिन्न स्तरका ट्राभल एड्भाइजरीहरु जारी गर्दै आएको छ । पहिलो स्तरको ट्राभल एड्भाइजरी जारी भएको मुलुकमा यात्रा गर्दा सामान्य सावधानीहरु अपनाउन सुझाव दिइन्छ भने दोश्रो स्तरको ट्राभल एड्भाइजरी जारी भएको मुलुकमा यात्रा गर्दा विशेष सावधानी अपनाउन सुझाव दिइन्छ ।
त्यस्तै तेश्रो स्तरको ट्राभल एड्भाइजरी जारी भएको मुलुकमा यात्रा गर्दा यात्राबारे पुनर्विचार गर्न सुझाव दिइन्छ भने चौथो स्तरको ट्राभल एड्भाइजरी जारी भएको मुलुकमा यात्रा गर्दा यात्रा नगर्न सुझाव दिइन्छ ।
The Travel Advisories for the following countries are Level 4 – Do Not Travel:
⛔Afghanistan
⛔Belarus
⛔Burkina Faso
⛔Burma
⛔Central African Republic
⛔Haiti
⛔Iran
⛔Iraq
⛔Lebanon
⛔Libya
⛔Mali
⛔Niger
⛔North Korea
⛔Russia
⛔Somalia
⛔South Sudan
⛔Sudan
⛔Syria
⛔Ukraine… pic.twitter.com/3YrvHQJ3cM— Travel – State Dept (@TravelGov) January 3, 2024
डिसेम्बरमा अमेरिकी विदेश मन्त्रालयले नेपालका लागि पनि ट्राभल एडभाइजरी अपडेट गरेको थियो । नेपाल यात्रा थर्दा बढ्दो सावधानी अपनाउनुपर्ने लेभल २ मा रहेको छ । जोखिमका सूचकहरूको आवधिक समीक्षा पछि ट्राभल एडभाइजरी पुन जारी गरिएको अमेरिकी विदेश मन्त्रालयले जनाएको छ ।
पृथक राजनीतिक हिंसाको सम्भाव्यताका कारण नेपालमा यात्रा गर्दा सावधानी बढाइएको अमेरिकी विदेश मन्त्रालयले जनाएको छ । शान्तिपूर्ण हुन खोजेका राजनीतिक प्रदर्शनहरू कहिलेकाहीं हिंसामा परिणत हुन सक्छन् र नेपाली अधिकारीहरूले बल प्रयोग गर्न सक्ने ट्राभल एडभाइजरीमा उल्लेख छ ।
यदि नेपाल भ्रमण गर्ने निर्णय गरेमा प्रदर्शन र भीडबाट बच्न अमेरिकी विदेश मन्त्रालयले आफ्ना नागरिकहरुलाई सुझाव दिएको छ । त्यस्तै एक्लै पदयात्रा वा आरोहण नगर्न सुझाव दिइएको छ । नेपालको आधिकारिक राष्ट्रिय निकुञ्ज र संरक्षित क्षेत्रहरूमा पदयात्रा गर्दा एकल वा विदेशी स्वतन्त्र ट्रेकर्सलाई स्थानीय गाइड वा भरिया प्रयोग गर्नुपर्ने नेपालको सरकारी आवश्यकता पूरा गर्न सुझाव दिइएको छ ।
सन् २०२३ को जुन २३ पछि अमेरिकी विदेश मन्त्रालयले झण्डै ६ महिनापछि सोमबार नेपालका लागि ट्राभल एडभाइजरी अपडेट गरेको हो । अघिल्लो सुझावमा एक्लै पदयात्रामा नजानमात्र भनिएकोमा यसपटकमा त्यसमा विस्तार गरिएको छ । यस अगाडिको सुझावमा नेपालका पूर्वाधार, सरकारी सेवाहरू र चिकित्सा सहायता अमेरिकी मापदण्डहरू अनुरूप नहुनसक्ने उल्लेख गरिएकोमा अहिले त्यो हटाइएको छ । पहिले ट्राभल एडभाइजरी ई श्रेणीमा जारी गरिएकोमा अहिले यु श्रेणीमा जारी गरिएको छ ।