टेक्सासका गभर्नरले अकस्मात विमानमा समेत कागजपत्रविहिन पठाउन थालेपछि न्युयोर्कमा नयाँ नियम
प्रकाशित मिति : पुस १२, २०८० बिहीबार
न्युयोर्क सिटीका मेयर एरिक एडम्सले बुधबार एक कार्यकारी आदेश घोषणा गर्दै आप्रवासीहरू बोक्ने चार्टर बस कम्पनीहरूले न्युयोर्क सिटीमा आइपुग्नु भन्दा ३२ घण्टा अगाडि सिटीलाई जानकारी दिनुपर्ने नियम लागु गरेका छन् । मंगलबार राती टेक्सासका गभर्नरले फैलाएको अराजकता पछि न्युयोर्क सिटीका मेयरको यो आदेश आएको हो ।
त्यस्ता बसहरु अब बिहान साढे ८ बजेदेखि मध्यान्ह १२ बजेसम्म सोमबारदेखि शुक्रबारसम्म मात्र न्युयोर्क सिटी आउन सक्नेछन् । न्युयोर्क सिटीले अन्य निर्देशन नदिंदासम्म यात्रुहरूलाई एउटा स्थानमा मात्र छोड्न सक्नेछन् । त्यसो गर्न असफल भएमा बस बम्पनीहरुलाई बी श्रेणीको दुराचार, सम्भावित जरिवाना, मुद्दा लगाइनुका साथै बसहरू पनि जफत गरिनेछ।
बस अपरेटरहरू र कम्पनीहरूलाई टेक्सासको गभर्नरको कार्यमा भाग नलिन एरिक आडम्सले चेतावनी दिएका छन् । समयमै जानकारी पाएमा एसाइलम खोज्दै न्युयोर्क आउनेहरुका लागि उचित व्ष्वस्था गर्न सक्ने मेयर आडम्सको भनाई छ । बसमा आउने आप्रवासीहरुलाई भने कुनै पनि हिसाबले जरिवाना नगरिने तथा नयाँ कार्यकारी आदेशले बसहरूमा आउने यात्रुहरूलाई असर नगर्ने उनले प्रष्ट पारेका छन् ।
मंगलबार राति टेक्सासका गभर्नर ग्रेग एबटले अराजकता फैलाएका थिए । उनले एल पासोबाट केनेडी एयरपोर्टका लागि अघोषित र असंयोजित उडान बुक गरेर झण्डै १८० जना कागजपत्रविहिनहरुलाई न्युयोर्क पठाएका थिए । तर उडान मौषमका कारण फिलाडेल्फिया डाइभर्ट भएको थियो । त्यसपछि आप्रवासीहरुलाई न्युयोर्क सिटीले बस पठाएर विहान साढे १२ बजे न्युयोर्कमा ल्याएको थियो । यो घटनापछि मेयर एरिक आडम्सको कार्यकारी आदेश आएको हो ।
न्युयोर्क सिटीका अधिकारीहरूका अनुशार टेक्सासका गभर्नरले शरण खोज्नेहरूलाई प्रमुख शहरहरूमा पठाउन उडान बुक गर्ने नयाँ रणनीति लिएका छन् । गत हप्ता पनि टेक्सास राज्यबाट आप्रवासी बोकेका १४ वटा बसहरू विना सुचना एकै रातमा आइपुगेका थिए । यो अहिलेसम्मकै उच्चतम संख्या हो । आप्रवासीहरु ठाउँमा लैजाने प्रतिक्षामा पोर्ट अथोरिटी बाहिर छुट्टै लाइनमा पर्खिरहेका थिए। कतिपय आप्रवासीहरु आठौं एभिन्यू तर्फ हिंडिरहेको देखिएको थियो ।
तर न्युयोर्क सिटीमा मात्र अघोषित रुपमा आप्रवासीहरुमा बसमा हालेर पठाइने नभई अन्य सिटीमा पनि टेक्सासका गभर्नरले यसरी आप्रवासीहरु पठाउने गरेका छन् । गत हप्ता १२० आप्रवासीहरुलाई उडान बुक गरेर शिकागो पठाइएको थियो ।