विना भिसा ३ सय भारतीयलाई अमेरिका छिराउन खोज्ने चार्टड विमान फ्रान्सबाट मुम्बई फिर्ता
प्रकाशित मिति : पुस ९, २०८० सोमबार
करिब ३ सय भारतीय नागरिकहरूलाई मध्य अमेरिका लैजाने क्रममा फ्रान्सेली एयरपोर्टमा रोकिएको चाटर्ड विमान मुम्बई प्रस्थान गरेको छ । मानव तस्करीको आशंकामा चार दिनअघि पेरिस नजिकै हिरासतमा विमान हिजो न्यायाधीशले अनुमति दिएपछि आज बिहान मुम्बई प्रस्थान गरेको छ । विमान झण्डै २५० यात्रुहरुसहित मुम्बई फर्केको जनाइएको छ ।
उनीहरु मानव बेचबिखनको शिकार हुनसक्ने संकेत पाएपछि प्रहरीले एक नाटकीय अपरेसनमा उनीहरुलाई नियन्त्रणमा लिएको थियो । उनीहरु निकारागुवाका लागि उडेका थिए ।
विमानमा बालबालिका र परिवार पनि थिए। स्थानीय नागरिक सुरक्षा एजेन्सीका अनुशार विमानमा सबैभन्दा कान्छो यात्रु २१ महिनाको बच्चा रहेका थिए भने १३ बच्चाहरु अभिभावक विनाका नाबालिग थिए । विमान दुबईबाट उडेको थियो भने प्राविधिक रोकावटका कारण बिहीबार उत्तरपूर्वी फ्रान्सको चालोन भेट्री एयरपोर्टमा अवतरण गरेको थियो । उनीहरु पहिले मध्य अमेरिका गएर त्यहाँबाट अवैध रूपमा अमेरिका वा क्यानडा प्रवेश गर्ने योजना बनाएको हुनसक्ने आशंका गर्दै फ्रान्समा रोकिएको थियो ।
फ्रान्सले न्यायिक छानबिन गर्न निकारागुआ जाँदै गरेको चार्टर उडानलाई ग्राउन्डेड गरेको थियो । रोमानियाली चार्टर कम्पनी लिजेन्ड एयरलाइन्सको एयरबस ए ३४० मार्फत उनीहरु निकारागुवा जाँदै थिए । एयरपोर्ट पेरिसबाट १५० किलोमिटर टाढा रहेको छ भने प्रायः सस्तो एयरलाइन्सद्वारा प्रयोग गरिन्छ।
संगठित अपराध विज्ञ एकाइले दुई जनालाई पक्राउ गरेको थियो । भारतले उडानमा सवार सबैलाई कन्सुलर पहुँच प्रदान गरेको थियो । अधिकारीहरू घटनास्थलमा पुगेर यात्रुको स्वास्थ्य अवस्थाबारे छानबिन गरेका थिए । फ्रान्समा भारतीय दूतावासले सामाजिक सञ्जालमा पोष्ट गर्दै दूतावासको टोली पुगेर कन्सुलर पहुँच दिएको तथा स्थितिको अनुसन्धान गरिरहेको बताएको थियो ।
फ्रान्समा अवतरण पछि तिनीहरूलाई पहिले विमानमा राखिएको थियो । तर पछि बाहिर टर्मिनल भवनमा व्यक्तिगत ओछ्यान दिइएको थियो । भट्री एयरपोर्टको रिसेप्शन हललाई यात्रुहरूलाई उत्तम रिसेप्शन अवस्थाहरू प्रदान गर्न व्यक्तिगत ओछ्यानहरू सहितको प्रतीक्षालयमा परिणत गरिएको थियो ।