सभापतिले बन्द सूचि सच्चाउने संकेत गरेपनि धेरै आश गर्ने ठाउँ छैन् : अजयबाबु शिवाकोटी
प्रकाशित मिति : आश्विन १३, २०७९ बिहीबार
नेपाली कांग्रेसका केन्द्रीय सदस्य अजयबाबु शिवाकोटीले समानूपातिकको बन्द सूचि सच्चाउने सभापतिले संकेत गरेर पनि धेरै आश गर्ने ठाउँ नरहेको बताएका छन् । कांग्रेसको शेखर कोइराला समूहले आयोजना गरेको चियापान कार्यक्रममा पत्रकारहरुसँग कुराकानी गर्दै शिवाकोटीले आधिकारीक निर्णय नभएसम्म अझै पनि आश गर्ने ठाउँ नरहेको बताएका हुन् । उनले भने, ‘सभापतिले सच्चाउने कुराको संकेत गर्नुभएको छ । तर, आधिकारीक निर्णय नभएसम्म अझै पनि धेरै आश गर्ने ठाउँ छैन् ।’
शिवाकोटीले आफूहरु बन्द सूची सच्चाउनुपर्ने भन्दै निरन्तर दबाबमा रहेको बताए । उनले आफूले गरेको खबरदारी पार्टीलाई घाटा पुर्याउने अभियान नरहेको स्पष्ट पारे । पार्टीलाई सही ठाउँमा ल्याउने र सबै नेता–कार्यकर्ताहरुलाई न्याय हुने गरि अगाडी बढ्न खोजिरहेका उनको भनाई छ । उनले भने, ‘हामी निरन्तर दबाबमा छौं । यसको मतलब पार्टीलाई घाटा पुर्याउने हाम्रो अभियान होइन् । पार्टीलाई पनि सही ठाउँमा ल्याउने र पार्टीका सबै साथीहरुलाई न्याय हुने गरि अगाडी बढ्न खोजिरहेका छौं ।’
उनले टिकट वितरणमा अन्याय अनुभुति गरेर देशभरबाट नेता–कार्यकर्ताहरु आन्दोलनमा रहेको बताए । उनले शिवाकोटीले टिकट वितरणको विषयलाई पार्टी सभापतिले समयमै सम्बोधन गर्नेमा र सभापतिको विवेक र न्याय गर्ने क्षमता माथि विश्वास रहेको उल्लेख गरे । ‘अहिले हाम्रो टिकट वितरणमा न्याय भएन भन्ने अनुभुति भएका कारणले अहिले यो खालको साथीहरु देशै भरीबाट असन्तुष्टि छन् । आक्रोशित छन् ।’ उनले भने, ‘त्यसलाई सम्बोधन समयमै पार्टी नेतृत्वले, अभिभावकीय भूमीकामा रहेका हाम्रा सभापतिले गर्नुहुन्छ भन्ने हामीलाई विश्वास छ र हामीलाई अहिले पनि सभापतिको विवेक माथि, न्याय गर्ने क्षमता माथि विश्वास छ ।’
नेपाली कांग्रेसको शेखर कोइराला पक्षले बिहीबार दसैंको अवसरमा चियापान कार्यक्रम आयोजना गरेको छ । कोइराला पक्षको खबरदारी अभियानले संघर्षकै रुपमा चियापान आयोजना गरेको जनाएको छ । कांग्रेसको कोइराला पक्षले समानुपातिक उम्मेदवार सूची सच्याउन सभापति शेरबहादुर देउवालाई दबाब दिँदै पार्टी भित्रै अन्तरसंघर्ष गरिरहेको छ । यसको स्वरुप बुधबार पार्टी केन्द्रीय कार्यालय, सानेपामा धर्ना समेत दिएको थियो ।
तर, बुधबारको धर्नामा सहभागी नभएका कांग्रेस नेता–कार्यकर्ताहरु पनि चियापानमा सहभागि थिए । चियापान कार्यक्रममा शेखर कोइरालासँगै उपसभापति धनराज गुरुङ, महामन्त्री गगन थापा लगाएतको उपस्थिति थियो । आगामी निर्वाचनको सिट बाँडफाँटमा सम्मानजनक रुपमा टिकट पाउनुपर्ने भन्दै अन्तरसंघर्षमा उत्रिएको कोइराला समूह महाधिवेशन भए देखि नै पार्टीमा न्यायोचित अवसर पाउनुपर्ने भन्दै खबरदारी गर्दै आएको छ ।