क्रेडिट कार्डमा साढे ८ लाख डलर घोटाला गरेको अभियोगमा न्युयोर्क निवासी आमाछोरी फन्दामा
प्रकाशित मिति : भाद्र १४, २०७९ मंगलबार
क्रेडिट कार्डमा साढे ८ लाख डलर घोटाला गरेको अभियोगमा न्युयोर्क निवासी आमाछोरी फन्दामा परेका छन् । लङ आइल्याण्ड निवासी आमा र छोरीलाई एक दशकभन्दा लामोसमय क्रेडिट कार्ड जालसाजी गरेको अभियोग लगाइएको छ ।
उनीहरूले डिजाइनर सामान खरिद गर्न र विलासी छुट्टि मनाउनका लागि बैंकहरूलाई लाखौं डलर ठगी गरेको आरोप लगाइएको छ । ६१ वर्षीय करण गेइस्ट र उनकी छोरी ३३ वर्षीया एलिसा गेइस्टलाई म्यानहट्टन सुप्रिम कोर्टमा हाजिर गराइएको थियो ।
उनीहरूविरुद्ध लगाइएको ठगीलगायतका आरोपहरूमा उनीहरुले दोषी नभएको दावी गरेका छन् । १३ बर्षमा क्रेडिट कार्डका हजारौं ट्रान्जेक्सनहरु समावेश रहेको सहायक जिल्ला न्यायधिवक्ता क्याथरिन म्याककाले सुनुवाइको क्रममा बताए ।
उनीहरुले सन् २००९ देखि २०२१ सम्म १४ विभिन्न क्रेडिट कार्ड कम्पनीहरूबाट साढे ८ लाख डलर घोटाला गरेको अभियोग छ । उनीहरुले क्रेडिटकार्डबाट विभिन्न सामानहरु किन्ने र पछि उक्त सामान आफूले नकिनेको भन्दै डिस्प्युट फाइल गर्ने गर्दै आएका थिए ।
त्यस्तै उनीहरुले पेरिस, मिलान, नर्वे, कोस्टारिका, हवाई र अन्य धेरै ठाउँहरूका लागि टिकट बुक गर्दै पछि डिस्प्युट फाइल गरेर रकम लिने गरेका थिए । उनीहरुले सामान किनेपछि आफ्नो कार्ड चोरी भएको र अरु कसैले सामान किनेको गलत रिपोर्ट गरेर २ लाख ५ हजार डलर अमेरिकन एक्सप्रेस र १ लाख ५५ हजार डलर चेस बैंकबाट पाएका थिए ।
उनले आफ्नो नाममा टिकट बुक गर्ने, परिवारका सदस्यहरुका नाममा कारहरु बुक गर्ने, आफ्नो नाममा होटल बुक गर्ने, घडी, गहना लगायतका महँगा सामान किन्ने र पछि आफ्नो कार्ड अरुले कसैले प्रयोग गरेको भन्दै डिस्प्युट फाइल गरेर रकम लिने गरेको अभियोग लगाइएको छ । डलर स्टोरमा सामान किनेको र कुकुरको अस्पतालमा रकम तिरेको समेत डिस्प्युट फाइल गरेर रकम लिएको अभियोग छ ।
बार्कलेज बैंकले उनीहरुले एउटा स्टोरमा सामान किनेको भिडियो फुटेज प्राप्त गरेका थिए । जसमा पछि उनीहरुले आफ्नो कार्ड अरु कसैले प्रयोग गरेको भन्दै रिपोर्ट गरेका थिए ।
प्रहरीले उनीहरुको घरमा छापा मार्दा १०० भन्दा बढी क्रेडिट कार्डहरू फेला पारेको थियो । आफैले सामान किनेर पछि अरुले किनेको भन्दै जालसाजीको रूपमा रिपोर्ट गरिएका रसिदहरू पनि भेटाएको थियो ।
शुक्रबार सुनुवाइपछि उनीहरुलाई पर्यवेक्षणमा रिहा गरिएको छ भने उनीहरूको राहदानी जफत गर्न आदेश दिइएको छ । आमा र छोरी लाई अर्कोपटक सेप्टेम्बर १४ मा अदालतमा पेश गरिदैछ ।