टर्कीमा सडक दुर्घटनामा परी दुई पत्रकारसहित ३५ जनाको मृत्यु
प्रकाशित मिति : भाद्र ५, २०७९ आईतबार
टर्कीमा दुई छुट्टाछुट्टै सडक दुर्घटनामा कम्तिमा ३५ जनाको मृत्यु भएको छ । पहिलो दुर्घटना गाजियांटेप र निजिप बीचको राजमार्गमा भएको थियो, जहाँ एक यात्रु बस र आपतकालीन टोली बोकेको गाडी ठोक्कियो। आपतकालीन टोली मार्डिन प्रान्तको डेरिकमा जाँदै थियो। गृहमन्त्री सुलेमान सोयुलुले घटनामा तीन अग्निनियन्त्रक, दुई चिकित्सक र दुई पत्रकारसहित १५ जनाको मृत्यु भएको बताए ।
सोयुलुले मारिएकामध्ये आठ जना बसमा रहेको बताए । दुर्घटनामा संलग्नलाई सहयोग गर्न गएका आफ्ना दुई पत्रकारको पनि दुर्घटनामा मृत्यु भएको इल्हास समाचार एजेन्सीले जनाएको छ । टेलिभिजन फुटेजमा दुर्घटनापछि एम्बुलेन्सको पछाडिको भाग गम्भीर रूपमा क्षति भएको र बस राजमार्गको छेउमा मोडिएको देखाइएको छ। गाजियन्टेपका गभर्नर दावुत गुलले घटनामा २२ जना घाइते भएको बताएका छन्।
अर्को घटना डेरिकमा भएको छ । ट्रकको ब्रेक फेल भएपछि दुईवटा सवारी साधनलाई ठक्कर दिएको छ । यसैबीच घटनास्थलमा पुगेको आकस्मिक टोली र उपस्थित भीडलाई अर्को ट्रकले ठक्कर दिएको थियो । सोयुलुले डेरिकमा भएको दुर्घटनामा २० जनाको मृत्यु भएको र २६ जना घाइते भएको बताए । घटनामा संलग्न दुई चालकलाई नियन्त्रणमा लिई अनुसन्धान सुरु गरिएको छ ।