अप्रिल १८ को डेडलाइनमा ट्याक्स फाइल गर्न छुटाउनुभयो ? अब के हुन्छ ?
यो बर्ष अमेरिकामा ट्याक्स फाइलका लागि अप्रिल १८ सम्मको डेडलाइन तोकिएको थियो । अप्रिल १८ सम्म ट्याक्स फाइल गर्न नसक्नेहरुले अवधि थपका लागि अनलाइनमार्फत वा कागजीरुपमा आवेदन दिनसक्ने सुविधा समेत रहेको थियो ।
अवधि थपका लागि आवेदन दिएकाहरुले ६ महिनाभित्र ट्याक्स फाइल गर्न सक्नेछन् । अवधि थप गर्दा तिर्नुपर्ने अनुमानित ट्याक्स रकम भने अप्रिल १८ वा त्योभन्दा अगाडि नै तिर्नुपर्छ ।
तर अवधि थपका लागि पनि आवेदन नदिएका र समयमा ट्याक्स फाइल नगरेकाहरुले भने ट्याक्स फाइल नगरेवापत जरिवाना तिर्नुपर्छ । जरिवाना रकम जतिदिन ट्याक्स फाइल गर्न ढिलो भएको छ त्यसको गणना गरेर वा ट्याक्स नतिरेको हरेक महिनाको गणना गरेर ट्याक्स तिर्नुपर्ने रकमको ५ प्रतिशतसम्म हुन्छ ।
कुल जरिवाना रकम व्यक्तिले तिर्नुपर्ने ट्याक्स रकमको २५ प्रतिशतभन्दा धेरै भने हुँदैन । आईआरएसले जरिवाना रकममा पनि ब्याज लगाउँछ । यदि ट्याक्स फाइल गर्न ६० दिनभन्दा धेरै ढिलो भएमा जरिवाना रकम ४३५ डलर वा रिटर्नमा देखाउन आवश्यक करको शतप्रतिशतमध्ये जुन कम छ, त्यो हुनेछ ।
त्यस्तै ट्याक्स समयमै फाइल गरेको तर रकम तिर्न नसकेकाहरुले पनि जरिवाना तिर्नुपर्ने हुन्छ । ट्याक्स नतिरेको रकममा प्रतिशतका आधारमा जरिवाना लगाइन्छ । ट्याक्स फाइल गरेकै दिनमा रकम तिर्न नसक्नेहरुका लागि किस्तामा तिर्ने र अनलाइनबाट तिर्ने सुविधा समेत रहेको छ ।
