न्युयोर्कमा नेपालीबाट संचालित मनी ट्रान्सफरमा दिउसै लुटपाट, झण्डै २३ हजार डलर लुटिएको दावी
प्रकाशित मिति : पुस १३, २०७८ मंगलबार
न्युयोर्कको ज्याक्सनहाइटमा नेपालीबाट संचालित मनी ट्रान्सफरमा दिउसै लुटपाट भएको छ । मनी ट्रान्सफरबाट झण्डै २३ हजार डलर लुटिएको दावी गरिएको छ ।
सोमबार दिउसो झण्डै साढे १ बजे लुटपाट भएको प्रत्यक्षदर्शी निमा पुन मगरले खसोखासलाई जानकारी दिए । ७२२८ ब्रोडवेमा रहेको मनी ट्रान्सफरमा बन्दुकसहित प्रवेश गरेको लुटेराले मनी ट्रान्सफरमा रहेको रकम र त्यहाँ पुगेका ग्राहकको रकम समेत लुटेका छन् ।
मनी ट्रान्सफरमा रहेको झण्डै २१ हजार डलर र त्यहाँ पुगेका ग्राहकहरुको झण्डै २ हजार डलर गरी कम्तीमा २३ हजार डलर लुटपाट भएको मगरले बताए । आफ्नो साथमा रहेको ४ सय डलर, आइफोन र बैंक कार्डहरु भएको वालेट समेत लुटिएको उनले जानकारी दिए ।
लुटेराले स्टोरमा प्रवेश गर्ने बित्तिकै बन्दुक निकालेर सबैलाई तल झुक्न भनेको र एकजना नेपालीले राम्रोसँग नबुझ्दा उनको टाउकोमा बन्दुकको कुन्दाले हानेको थियो । मगरले भने -‘हामीसँग रहेका रतिवन बुढामगरलाई बन्दुकको कुन्दाले टाउकोमा हान्यो । त्यसपछि नगद, मोबाइल, वालेटहरु कालो ट्रयास ब्यागमा राखेर बाहिर निस्क्यो ।’
लुटेरा झण्डै ५ मिनेटसम्म मनी ट्रान्सफरभित्र बसेको थियो । लुटेको बाहिर निस्केको केहीबेरसम्म पनि आफूहरु प्रहरीलाई खबर गर्न डराएको र झण्डै पाँच मिनेटपछि खबर गरेको १० मिनेटभित्रै प्रहरी घटनास्थलमा आएको मगरले जानकारी दिए । आफ्नो मोबाइलको लोकेशन ट्रयाक गर्दा नजिकैको अपार्टमेन्टमा देखिएपनि प्रहरीले सिधै अपार्टमेन्टमा जान नमिल्ने र घटनाबारे अनुसन्धान गर्ने बताएको मगले जानकारी दिए ।
मनी ट्रान्सफरमा सीसीटिभी क्यामेरा नरहेको र छेउको स्टोरमा रहेको सीसीटिभी क्यामेरापनि राम्रोसँग नचल्ने भएकाले बाहिरपट्टीको क्यामेरामा लुटेरा भित्र आएको र बाहिर निस्केको दृश्य कैद भएको जनाइएको छ । उक्त तलामा अरु स्टोरहरु समेत रहेपनि लुटेरालाई मनी ट्रान्सफरलाईमात्र निशाना बनाएको थियो ।