न्युयोर्कबासीले कोरोनाबिरुद्धको भ्याक्सिन कार्ड हराएमा वा नष्ट भएमा के गर्ने ?
कोरोनाबिरुद्धको भ्याक्सिन कार्ड हराएमा वा नष्ट भएमा के गर्ने भन्नेबारे कतिपयमा अन्यौल देखिन्छ । तर यो कार्ड हराएमा वा नष्ट भएमा त्यसको साटो नयाँ कार्ड प्राप्त गर्न सोंचेजति कठिन छैन ।
आगामी केहीमहिनासम्म न्युयोर्कबासीहरुले कोरोनाबिरुद्धको बुस्टर शट लगाइरहेका छन् । बुस्टर शट लगाउनका लागि पहिले भ्याक्सिन लगाएको प्रमाण देखाउनुपर्ने हुन्छ । खासगरी पहिले लगाएको भ्याक्सिनको तुलनामा बुस्टर शट लगाउने भ्याक्सिन फरक भएको खण्डमा पहिलेको भ्याक्सिनको प्रमाण देखाउनु अझ महत्वपूर्ण छ ।
न्युयोर्क राज्यको डिपार्टमेन्ट अफ हेल्थले भ्याक्सिन कार्ड सुरक्षित स्थानमा राख्न र यसको तस्वीर लिएर राख्न सुझाव दिएको छ । तर यसो गर्न नभ्याउँदै कार्ड हराएमा वा नष्ट भएमा नयाँ भ्याक्सिन कार्ड प्राप्त गर्ने केही तरिकाहरु छन् ।
यदि तपाईले सीभीएस वा वालग्रिनमा कोरोनाबिरुद्धको भ्याक्सिन लगाउनु भएको थियो भने भ्याक्सिन लगाएको प्रमाण निकाल्न अत्यन्तै सहज छ । तपाई त्यहाँ पुगेर अनुरोध गर्नुभएको खण्डमा उनीहरुले सहजै भ्याक्सिन लगाएको प्रमाण प्रिन्ट गरेर दिनेछन् । प्रिन्ट गरेर दिइएको कागजमा कहिले र कुन भ्याक्सिन लगाएको विवरण उल्लेख गरिएको हुन्छ ।
सीभीएसबाट भ्याक्सिन लगाएकाहरुले सीभीएस फार्मेसीको अनलाइन वा एप्लीकेशनमा गएर पनि आफ्नो विवरण निकाल्न सक्छन् । तर त्यसको लागि अनलाइनमा एकाउन्ट बनाउन आवश्यक हुनेछ । भ्याक्सिन लगाएपछि ग्राहकले यसबारे इमेलपनि प्राप्त गर्ने भएकाले पहिलेको इमेल चेक गर्न समेत सुझाव दिइएको छ ।
राइट एडले पनि डिजिटल रेकर्ड अनलाइनमा उपलब्ध गराएको छ । त्यसका लागि ग्राहकले राइट एडमा अनलाइन एकाउन्ट बनाएर हेर्नसक्नेछन् । त्यस्तै स्वास्थ्य सेवा प्रदायकहरुकोमा भ्याक्सिन लगाएको भएमा उनीहरुले पनि भ्याक्सिन लगाएको रेकर्ड फाइलमा राखेका हुन्छन् । त्यस्तै राज्यले संचालन गरेको आम भ्याक्सिन केन्द्रमा भ्याक्सिन लगाएको भएमा न्युयोर्क राज्यको हटलाइन नम्बर ८३३ ६९७ ४८२९ मा सम्पर्क गर्न सकिनेछ ।
त्यस्तै एक्सलसियर पास र एक्सलसियर पास प्लस नामका एप्लीकेशनबाट पनि भ्याक्सिन लगाएको डिजिटल प्रमाण प्राप्त गर्न सकिन्छ । यो पासका लागि न्युयोर्कबासीले भ्याक्सिन लगाएको १५ दिनपछि आवेदन दिनसक्छन् । बुस्टर लगाएपछि एक्सलसियर पासका लागि आवेदन दिन आवश्यक पर्दैन । तर अहिले एक्सलसियर पास भएकाहरुले आगामी मार्च ३१ पछि नयाँ पासका लागि आवेदन दिन आवश्यक छ । किनभने उक्त मितिपछि यो अहिलेको पासको म्याद समाप्त हुन्छ ।
